DILI, 03 Juñu 2026 (TATOLI)—Governu liuhusi reuniaun KOnsellu Ministru, kinta ne’e, aprova projetu Rezolusaun Governu ne’ebé hanaruk períodu vijénsia suspensaun ba ensinu, aprendizajen no prátika arte marsiál, no mós enserramentu temporáriu ba fatin no instalasaun hotuhotu ne’ebé utiliza ba ensinu, aprendizajen no prátika arte marsiál to’o 31 Dezembru 2026.
Notísia Relevante: Governu kontinua suspende prátika arte marsiál to’o Dezembru
Sekretáriu Estau Komunikasaun Sosiál, Expedito Dias Ximenes, ne’ebé reprezenta Governu hodi halo rezumu badak ba desizaun iha Konsellu Ministru hateten, iha diskusaun ohin debate mós kona-ba suspensaun prátika arte marsiál nian.
“Ohin, Governu deside suspende ka hanaruk atividade prátika arte marsiál nian iha Timor-Leste, bazeia ba desizaun ne’ebé aprova mós iha tinan kotuk,” Goverante ne’e informa ba jornalista sira iha Palásiu Governu, ohin.
Enkuantu desizaun ne’e kontinua Rezolusaun Governu nú. 45/2023, loron 10 fulan-Novembru, ne’ebé prolonga ona tuituir malu liuhosi Rezolusaun n. 17/2024, loron 24 fulan-Abril, n. 60/2024, loron 7 fulan-Novembru, n. 22/2025, loron 7 fulan-Abril no n. 77/2025, loron 17 fulan-Dezembru.
Tamba presupostu sira ne’ebé justifika suspensaun ne’e vigora nafatin liuliu nesesidade atu hametin dame sosiál ne’ebé hetan ona dezde fulan-Novembru 2023 no atu garante katak prátika arte marsiál sei bele halo de’it iha kontestu desportivu, hodi kontribui ba formasaun sívika no umanista ba joven sira.
Iha loron 30 fulan-jullu tinan 2025, Governu Konstitusionál IX aprova proposta-lei ida, ne’ebé submete ona ba Parlamentu Nasionál, neʼebé ho objetivu atu regula rejime jurídiku foun ba prátika arte marsiál.
Nune’e to’o proposta ne’e aprova no tama iha vigór, kontinua nafatin suspensaun no enserramentu temporáriu ba fatin sira ne’ebé utiliza ba ensinu, aprendizajen no prátika arte marsiál.
Notísia Relevante: Governu hakarak regulariza prátika arte marsiál hodi hola parte iha dezenvolvimentu
Jornalista : Alexandra da Costa
Editór : Cancio Ximenes
