DILI, (TATOLI)- Maubessi, dalarua rua ona selebra nia “Festivál ” iha tinan rua ba kotuk ne’ebé foku barak liu ba ai-funan, maibé tinan ne’e mosu ideia hodi muda fatin no lori Maubessi mai Dili ne’ebé sei hanaran “Expo Dili Verde Hosi Maubessi”.
Ko-fundadora ba Eskola Verde Leublora Maubessi, Bella Galhos, ne’ebé envolve maka’as ba dezenvolvimentu ekonomia área rurál hatete, iha inisiativa hodi halo feira iha Dili tanba Governu liuhusi Ministériu Turizmu, Arte no Kultura lahalo festival ne’e hanesan konsisténsia katak halo depois haluha.
Tanba realiza dala rua iha fatin hanesan, nune’e mosu ideia atu lori Maubessi ba Dili ho razaun tanba ema barak lamenta kona-ba estrada aat, Maubessi dook no buat balun laiha, nune’e laiha vontade atu hakat ba rai refere.
“Entaun ha’u tenta lori Maubessi ba Dili, tau iha Dili nia klaran hodi haree took razaun saida tan,” Bella subliña.
Nia haktuir, espozisaun ne’e mós atu hatudu produsaun ne’ebé mak ema iha área rurál sira durante ne’e esforsu para tau iha merkadu, iha meza, ladún hetan valór boot, nune’e tenta para lori valór ne’e ba hatudu iha Dili.
“Katak hahán, modo no ema sira mak ne’e. Nu’usá ita labele utiliza ita-nia produtu lokál sira no kontinua konsumu no depende demais ba sasán sira husi liur, entaun ita la ajuda dezenvolvimentu ekonomia família sira iha área rurál. Nune’e, dada Maubisse ho ema sira-nia esforsu ne’e ba Dili”.
Ko-fundadora ne’ebé iha feira ne’e sei hatudu ai-funan husi Maubessi ne’e hatete tanba tinan-tinan, Governu ka instituisaun balun no pesoál lori ai-funan husi fatin seluk, nune’e nia parte lori ai-funan modelu oioin husi Maubessi hodi mostra katak Timór tenke lori ai-funan husi liur ka valoriza ema sira ne’ebé dedika sira-nia an kuda ai-funan.
Bella haktuir, razaun seluk tan lori Maubisse ba Dili tanba hakarak hatudu ba ema sira iha Dili atu banati tuir ema sira iha foho oinsá sira proteje sira-nia natureza, tenta atu moris rasik ho sira-nia kintál maibé ema Dili serbisu mak hafoer sidade, estraga ai-oan no kuaze laiha konsiénsia ba meiu-ambiente.
Espozisaun ne’e, sei hatudu produtu lokál hanesan fehuk-europa, repollu, senoura, fore-kili, modo tahan, ai-fuan no ai-moruk.
“Modo no ai-fuan sira ne’e, ita-nia maluk sira prepara ona no ami fasilita transporte, espera eventu ida ne’e inspira fali ema seluk,” nia dehan.
Expo ne’e sei partisipa husi Grupu feto no animál nian hamutuk lima ne’ebé iha membru 25, grupu fa’an ai-funan husi merkadu manleuana no kuaze grupu 10 mak sei envolve.
Lahetan Autorizasaun husi Autoridade Munisipál
Expo Dili Verde Hosi Maubessi ne’ebé sei realiza iha 8 Abríl 2017 ne’e, tuir planu atu selebra iha Largo Lecidere, maibé lahetan autorizasaun husi Prezidente Autoridade Munisipál Dili. Nune’e feira ne’e sei realiza fali iha Bidau Santa-Ana.
Razaun lapermite feira refere iha fatin públiku ne’e tanba iha poténsia atu estraga jardin, nune’e sujere ba fatin seluk.
“Lafó alternativu, nein fatin ida mai ami, entaun ha’u telefone fali xefe suku Bidau Santa Ana hodi husu tasi ibun ema fa’an ikan nian. Fatin ne’e laapropriadu tebes maibé ami sei hamoos fatin ida ne’e para tau tenda ne’ebé ajuda husi MCIA,” katak Bella.
Jornalista: Maria Auxiliadora / Editor: Gantry Meilana
