DILI, (TATOLI) – Klínika no farmasia ne’ebé eziste tenke kumpre regulamentu ne’ebé fó sai hosi Ministériu Saúde (MS), kuandu la-hakruk sei hetan koima (multa).
“Aimoruk ne’ebé tama iha portu tenke selu item ida U$100 no prense kritériu, kuandu laiha sei hetan koima ka selu ho 100 mill ou 50.000 mill ba leten”, informa Diretora Jerál Prestasaun Servisu hosi Ministériu Saúde, Odete da Silva Viegas ba Tatoli hafoin partisipa aprezentasaun rezultadu servisu hosi Komisaun Nasionál HIV/SIDA iha Praias dos Coceiros, kuarta (26/4).
Kuandu la prense kritéria bázika, ministériu fó xamada atensaun no bele mós taka sira nia negósiu, enkuantu sira faan aimoruk ne’ebé laiha autorizasaun.
Diresaun Nasionál Farmasia halo elaborasaun polítika kona-ba aimoruk, klínika privada no farmasia privada oinsá submete ba Konsellu Ministru atu ofisializa ba futuru, nune’e bele kontrola di’ak liu tan.
“Agora iha ona preparasaun ba esbosu finál, hanesan klínika Bailing, Kura Hao faan aimoruk balun ne’ebé mak la-rejista, signifika tenke selu multa no tenke rejista fali aimoruk nia naran tanba aimoruk barak tama sira laiha koñesimentu no la tuir ona item ne’ebé iha”, haktuir.
Antes ne’e, ekipa Inspesaun Jerál Saúde identifika Farmásia Kura Hao seidauk iha dokumentu importasaun, aimoruk ladauk rejistu iha MS, no aimoruk item 10 liu prazu. Alende ne’e, naran aimoruk maioria sei hakerek ho lian Xineza.
Entretantu, klínika Xue Lai Shu ladauk iha lisensa operasionál hosi MS inklui Klínika Bailling ne’ebé faan aimoruk liu prazu, aimoruk ne’ebé rejistadu iha MS hamutuk lima maibé realmente klínika faan fali aimoruk ho kuantidade 50.
Hosi irregularidade ne’e, ministériu saúde fó ona notifikasaun, sansaun ou koima no ikus liu sei taka totalmete atividade ba farmásia ka klínika sira ne’ebé kontra regulamentu tuir dekretu lei ne’ebé mak estabelese.
Bazeia dekretu lei númeru 12/2004 atu haree aimoruk ne’ebé liu prazu, tenke rejistu importasaun aimoruk, presiza justifika produtu aimoruk, tenke iha dokumentu legál, rejistu medikamentu iha MS.
Jornalista: Zezito Silva
Editora: Rita Almeida
