DILI, (TATOLI) – Universidade Nasionál Timor Lorosa’e (UNTL), Fakuldade Ekonomia no Jestaun, Departamentu Turizmu liliu semestre hitu, ba dahuluk promove tais Timor-Leste hanesan vestuária ne’ebé uza bainhira iha aula máteria Gestão dos Meios de Hospenagem.
Miguel da Costa Pinto, estudante husi Departamentu Turizmu semestre hitu ne’e hatete departamentu ne’e seidauk iha uniforme no baibain hatais roupa mutin no metan maibé agora laós ona tempu entaun uza tais hanesan identidade nasionál ne’e.
“Ami-nia dosente hakarak ami promove identidade Timór nian hanesan tais nune’e dosente halo planu depois kostum ida tais ne’e ami uza iha loron kinta”, Miguel relata iha Muzeu Rezisténsia, horisehik.
Hatais ba mane estudante mane sira mak uza faru tais no kalsa metan, ba feto uza vestida tais ne’ebé utiliza mós asesória hanesan morten no seluk tan.
“Louva tebes hatais ne’e tanba ita bele promove vestuária ida ne’e ba ita-nia nia nasaun no ema seluk tanba agora dadaun iha influénsia ne’ebé maka’as tebes husi parte seluk maibé ami-husi Departamentu Turizmu, Universidad Nasionál Timor Lorosa’e lakohi lakon ami-nia identidade no mantein atu nune’e bele promove ba mundu”, estudante ne’e hatete.
Jornalista: Maria Auxiliadora
Editora: Rita Almeida
