DILI, (TATOLI) – Prezidente Repúblika, Taur Matan Ruak, sesta ohin iha Palásiu Prezidensiál entrega medalla colar ordem Timor Leste ba lider titulár Estadu hanesan Parlamentu Nasionál, Governu, Tribunál Rekursu, Prokuradór Jerál Repúblika.
Sira ne’ebé simu mak Prezidente PN, Adérito Hugo da Costa, eis Prezidente PN, Vicente da Silva Guterres, Primeiru Ministru, Rui Maria de Araújo, eis Prezidente Tribunál Rekursu, Guilhermino da Silva no Prokuradór Jerál Repúblika, José da Costa Ximenes.
Xefe Estadu atribui mós medalla grau insigna ordem ba Vise Xefe Estadu Maior FALINTIL-FDTL, Brigadeiro Jenerál Filomeno Paixão, Xefe Estadu Maior Coronel, Falur Rate Laek no Segundu Komandante PNTL, Komisáriu, Faustino da Costa.
Taur Matan Ruak iha ninia diskursu hatete kondekorasaun ne’e tanba sira presta ona servisu ho kualidade ba instituisaun Estadu, Nasaun no povu.
ʺServisu sira ne’ebé hato’o ne’e sai extra-ordinariamente importante no fó-onra ba instituisaun sira no Nasaun”, dehan.
Durante mandatu, hetan kolaborasaun servisu di’ak ho titulár órgaun soberanu hirak ne’e ba funsionamentu makina Estadu.
ʺHa’u hakarak iha momentu ida-ne’e foka ho maneira espesiál ba sira-nia kontribuisaun importante iha kultura kolaborasaun leál ida entre órgaun soberania sira no solidaridade entre instituisaun sira Estadu nian ne’ebé hotu-hotu hatudu durante ha’u-nia mandatu hanesan Prezidente Repúblikaʺ, katak PR.
Primeiru Ministru, Rui Maria de Araújo hato’o agradesementu espesiál ba Prezidente Repúblika fó ona kondekorasaun.
ʺHa’u hakarak hato’o agradesementu espesiál ba Prezidente Repúblika, Taur Matan Ruak ne’ebé kondekora ona titulár órgaun soberania inklui ha’u hanesan Primeiru Ministruʺ, dehan nia liuhosi konferénsia imprensa iha Palásiu Governu, ohin.
Jornalista: Agapito dos Santos
Editora: Rita Almeida
