DILI, (TATOLI) – Objetivu Dezenvolvimentu Sustentavel (ODS) númeru 6 kona-ba garante disponibilidade no sujestaun sustentavel ba bee-moos no saneamentu ba ema hotu, nune’e Timor-Leste presiza garantia ba ema hotu iha direitu no uza bee-moos hanesan, nune’e presiza halo estudu viabilidade ida.
Vise-Ministru Obra Públika, Transporte no Komunikasaun II, Inácio Freitas Morreira hatete Governu daudaun halo planu oinsá atu hadi’a bee ba iha komunidade sira. Entantu Iha Dili laran hetan problema tanba planu sidade tuan liu no instalasaun bee-moos komplikadu uitoan, nune’e tenke halo fali estudu ida para depois halo fali instalasaun bee-moos ho di’ak atubele fornese ba ema hotu ne’ebé hela iha Dili.
“Nomós lataka dalan ba iha ita-nia munisípiu sira. Ita hotu hatene katak Timor-Leste riku bee maibé presiza duni halo estudu viabilidade ida para haree loloos oinsá ita bele adota ho teknolojia ne’ebé modernu. Ami hasoru malu ho empreza sira ne’ebé bele mai halo esplikasaun mai ita oinsá mak ita bele dada bee-moos iha foho lolon sira ne’e?”, Inácio haktenik.
Daudaun ne’e iha ona teknolojia ne’ebé adota no hili atubele halo distribuisaun bee-moos ba ema hotu. Governu nia planu oinsá bele halo barrajen tanba fonte bee barak mak estraga de’it.
“Presiza duni halo planu ne’ebé apropriadu hafoin bele ezekuta, mas osan tau barak depois rekursu umanu lanatoon dalaruma ezekusaun ne’e bele mós falla”, Vise hatete iha Otél Novu Turizmu, horisehik.
Dezafiu boot ba Timor-Leste mak rekursu umanu. “Ita ko’alia kona-ba sustentabilidade la’ós halo de’it depois husik hela mas iha sustentabilidade tenke halo manutensaun ne’ebé di’ak no ita sei halo para nia bele kontinua uza ho di’ak no ita tenke la’o nafatin bá oin”.
Tanba ne’e Governu nia planu hahú daudaun no presiza define polítika bee-moos nian ba nasaun bainhira polítika desididu ona bele la’o tuir planu asaun ne’ebé Timor-Leste hakarak. Jornalista: Maria Auxiliadora
Editora: Rita Almeida
