DILI, (TATOLI) – Prezidente Konsellu Imprensa Timor-Leste, Virgilio Guterres husu atu atividade jornalizmu nian, jornalista sira labele halo verdade sai abstratu maibé hatudu verdade ho loloos.
“Verdade ne’e sagradu ba jornalista sira, tanba ne’e jornalista iha nia servisu labele halo verdade sai abstratu”, Virgilio Guterres husu ba jornaista sira iha nia intervensaun ba konferénsia internasionál ne’ebé mak konsellu Imprensa (KI) realiza iha Delta Nova hodi komemora loron aniversáriu tinan ida KI nian, tersa (10/5).
Jornalista sira mós bainhira hala’o nia kna’ar tenke bazeia ba vertude jornalizmu. Virtude hirak ne’e mak, liberdade, verasidade, ónestidade no responsabilidade.
Alende ida ne’e, husu atu responsavel orgaun komunikasaun sosiál labele halo presaun phisikolojia ba jornalista bainhira hala’o kna’ar maibé husik jornalista hala’o kna’ar ho livre.
Nune’e mós jornalista sira bainhira iha liberdade ona atu hala’o kna’ar tenke hala’o ho ónestidade labele iha konflitu interese.
“Fó sai notísia tenke garante katak, edukasaun, informasaun no diverte”, Virgilho husu.
Jornalista: Manuel Pinto
Editora: Rita Almeida
