DILI, (TATOLI) – Ministériu Edukasaun (ME) liuhusi kurríkulu nasionál baze pré-eskolár ensinu báziku halakon ezame iha primeiru síklu, hodi introdús modelu avaliasaun formativu no sumativa ne’ebé mak halo diária, semanál no mensál hafoin soma hamutuk hodi fó nota ba estudante sira-nia dezenvolvimentu.
“Sé ita mantein nafatin modelu ezame uluk, tanba ita foin iha 326 fasilidade ba pré-eskolár, signifika persentajen boot labarik Timór mak seidauk asesu ba pré-eskolár, entaun bainhira tama primeiru anu pur volta tinan neen, tama primeiru anu ensinu báziku, janeiru, fevereiru no marsu ita fó kedan ezame ba sira”, katak Vise-Ministra, Dulde de Jesus Ximenes iha Otél Novu Turizmu foin lalais ne’e.
Hatutan: “La’ós bazeia ba dixiplina maibé bazeia ba komponente tolu kurríkulu nian mak linguístiku, dezenvolvimentu pesoál no sientífiku”.
Iha Objetivu Dezenvolvimentu Sustentavel (ODS) númeru haat kona-ba edukasaun no kualidade tau mós importánsia ba ema adultu ne’ebé lakonsege halo hotu sira-nia eskola.
“Ministériu Edukasaun kontinua programa alfabetizasaun no iha tinan 2016 to’o 2017 ita reforsa tan programa ekivalénsia ba ensinu báziku ba ema Timór ne’ebé lakonsege hakotu nivel ensinu báziku”.
Jornalista: Maria Auxiliadora
Editora: Rita Almeida
