DILI, (TATOLI)-Timor-Leste daudaun ne’e iha broka hamutuk 28 ne’ebé kompostu ema estranjeiru hodi servisu hamutuk ho timoroan sira, informa Diretór Jerál Alfándega, Minstériu Finansa, José António Fátima Abílio.
Broka mak ajénsia ida ne’ebé Alfándega prepara no fó formasaun kona-ba servisu Alfándega nian, lei no oinsá atu hatama high score sistema armonizadu produtu sira tuir ida-idak nia kode nomós trata esportadór no importadór nia sasán.
Bainhira atu hahú projetu pilotu sistema Asycuda World, Alfándega tenta hodi formaliza tanba atu sai hanesan despaxante tenke prienxe kritéria mak tuir formasaun no ezame hafoin liu mak bele hetan sertifikadu.
“Tenke iha office ne’ebé apropriadu para halo serbisu importadór nian no tenke iha garantia banku hodi asegura katak bainhira halo serbisu mak hakarak atu halai maka garantia banku iha para selu fali Estadu nia osan”, José katak iha Avenida Martires da Pátria, ohin.
Sertifikadu refere lahetan definitivamente tanba tinan rua-rua Alfándega halo fali avaliasaun tanba balun depois tuir tiha formasaun lahalo serbisu hanesan broka, nune’e nafatin tau matan atu haree sira-nia kapasidade no koñesimentu sei nafatin ka la’e no laserbisu ona entaun tenke hapara.
Sobre importadór baibain daudaun ne’e lahatene programa sobre projetu pilotu refere, tanba ne’e mak intermediáriu ba importadór no esportadór hatama sasán sira ne’e mak broka ka despaxante sira.
Bainhira iha futuru iha kompañia ka individu ida mak hatene sistema no lei Alfándega nian hakarak hatama sasán, sira rasik bele halo serbisu ida ne’e no lataka dalan.
Jornalista: Maria Auxiliadora
Editora: Rita Almeida
