DILI, (TATOLI) – Estadu liuhusi Prezidente Repúblika sesante, Taur Matan Ruak ohin kondekora medalla colar ordem Timor-Leste ba eis Governadór Timor-Timur iha okupasaun Indonézia, Mario Viegas Carrasçalão tanba fó ona apoiu màsimu durante prosesu luta ba ukun-àn.
“Kondekorasaun ne’e obrigasaun Estadu nian atu rekuñese apoiu sidadaun sira nia ba prosesu luta libertasaun nasionál”, dehan Taur Matan Ruak durante distribui kondekorasaun iha Palàsiu Prezidensiàl Bairo-Pite Dili.
Maske livre no independente nu’udar Nasaun, maibè dezafiu seluk maka luta ba moris di’ak tanba ne’e tenke fó nafatin kontribuisaun ba Estadu.
Mario Viegas Carrasçalão hateten agradese ba rekuñesementu hosi Estadu ba luta durante okupasaun Indonézia hanesan sidadaun timoroan.
“Ohin ha’u la-espera atu simu kondekorasaun, tanba ha’u halo servisu, obrigasaun nu’udar timoroan ida hetan posizaun hanesan governadór atu halo buat barak ba timor iha momentu neba”, dehan eis governante iha governasaun Aliansa Maioritaria Parlamentár.
Kondekorasaun ne’e hanesan rekuñesementu, tanba ne’e sei kontinua iha obrigasaun atu fó apoiu ba dezenvolvimentu. “La simu kondekorasaun mós ha’u nafatin iha obrigasaun atu servisu ba ita nia rai”, tenik.
Nia husu ba ukun nain sira, liliu jerasaun foun sira atu ukun rai ne’e ho responsabilidade no domin.
Jornalista: Agapito dos Santos
Editora: Rita Almeida
