DILI, (TATOLI) – Ministru Koordenadór asuntu Administrasaun Estadu e Justisa no Ministru Justisa hatete, mehi ne’ebé proklamadór independénsia, saudozu Francisco Xavier do Amaral halo ona ba Nasaun bele sai nafatin inspirasaun ba jerasaun foun sira.
“Atu jerasaun foun labele sente desligadu ho istória pasada, mehi ne’ebé mak proklamadór, Francisco Xavier hahú ona ba Nasaun bele sai nafatin inspirasaun ba jerasaun foun”, haktuir Dionísio Babo iha seromonia inagurasaun monumentu proklamadór nian iha rotunda merkadu antiga Dili, loraik ne’e (20/5).
Monumentu ne’e simboliza onra no sakrifisiu proklamadór nian ba luta ba independénsia.
Serimonia halulik monumentu ne’e no fatuk sira ne’ebé badaen sira tau hamutuk hodi nakfilak ba illas. “Bele fó mahon husi jerasaun ba jerasaun no sai duni simbolu ida ne’ebé bele konsolida unidade no estabilidade ba dezenvolvimentu nasionál”, hatutan.
Governante ne’e husu ba timoroan hotu hamutuk atu hametin independénsia tuir espiritu luta saudozu nian. “Mai ita hamutuk konsolida unidade no estabilidade ba dezenvolvimentu nasionál”, apela.
Jornalista: Rafy Belo
Editora: Rita Almeida
