DILI, (TATOLI) – Governu fó lisensa tan ba ró tolu husi kompañia Best Seafood atu hakail ikan iha parte Kosta Súl nian, informa Diretór Jerál Pekas, Ministériu Agrikultura no Peska (MAP), Acacio Guterres iha edifísiu MAP Komoro, ohin.
Lisensa ne’ebé Governu fó hahú iha abríl 2017 durante tinan ida hafoin renova. Kada ró iha timoroan na’in-ida ne’ebé mak hala’o mós servisu iha ró refere.
Kompañia Best Seafood ne’e mai kleur tiha ona. Uluk hala’o nia atividade iha Hera tanba hetan akordu husi ministériu liuhusi ministru anteriór atu rekolla ahu-ruin no manabe maibé haree fali ba lei manabe labele book, nune’e ministru atuál hapara sira-nia lisensa no autoriza hatama fali ró atu hakaer fali ikan.
“Iha 2016 sira hatama ró rua maibé altura ne’ebá sira hetan tiha lisensa depois fulan ida de’it rezultadu ladún di’ak entaun sira troka tiha fali ekipamentu kaer ikan ne’e mak ró tolu mai fali”, Acacio relata.
Relasiona ho akontesimentu ró 15 husi kompañia Hong-Long depois rezolve hotu problema, ministériu sei halo aproximasaun ho Sekretáriu Estadu ba Polítika Formasaun Profisionál no Empregu (SEPFOPE) para halo rekrutamentu ba joven sira ne’ebé hakarak serbisu.
“Ró 15 ne’e loloos iha timoroan na’in-lima maibé barak mak la aguenta no iha problema entaun tun hotu no agora iha na’in-lima de’it mak serbisu iha ró leten”.
Entantu, ministériu sei koordena fali ho kompañia no SEPFOPE hodi halo rekrutamentu foun atu halo serbisu iha ró. Ho esperiénsia ne’ebé iha, atu rekruta traballadór sira ne’e, fó treinamentu ba sira para to’o iha fatin serbisu labele iha loron ida ka rua hakarak fila.
“Ministériu Agrikultura hanoin halo rekrutamentu no fó treinamentu báziku ba sira tanba joven barak ne’ebé iha tasi ibun hakarak atu serbisu maibé ita rezolve tiha lai problema hotu mak foin halo ida ne’e”.
Jornalista: Maria Auxiliadora
Editora: Rita Almeida
