DILI, (TATOLI)—Ministériu Agrikultura no Peska (MAP) aútoriza Kompaña Naroman Timorindo Fisheries (NTF), hodi halo peska industriál iha tasi mane.
Ministru Agrikultura no Peska, Estanislau Aleixo da Silva informa, aútorizasaun ne’e MAP fó ba NTF, tanba Empreza ne’e hatama ona proposta ba Ministériu Agrikultura no Peska.
“Empreza ne’e hatama ona proposta, sira aleinde hakail ikan, sei haki’ak mós ikan no boek nomós halo prosesamentu ba ikan no fó ró ba peskadór tradisionál sira, depois rekolla fali ikan hosi peskadór hodi halo prosesamentu,” Ministru Estanislau Aleixo da Silva, informa, iha nia knaar fatin, foin lalais ne’e.
MAP mós oras ne’e dadaun fasilita ona Ró peska ba kompañia estranjeiru tantu timoroan sira.
Orgullu ba MAP mak foin ba dahuluk, kompaña timoroan ida aprezenta proposta konkreta atu halo peska.
Entertantu Diretór Jerál Peska, Acacio Guterres reforsa, sira nia parte sei sei hein despaxu hosi ministru hodi halo diskusaun kle’an liután nune’e kompaña bele hahú ona nia aktividade.
“Kompañia ne’e la’ós timoroan mesak, parese halo kooperasaun ho Indonézia tanba sira mak iha ró. Ami sei lafó ró barak ba sira, maibé másimu lima para sira hahú peska, depois mak ita halo evaluasaun fali presiza aumenta ka la’é no sira-nia baze ne’e iha planu sei halo iha Lautein ne’ebá”, Acácio esplika tuir.
(Jornalista : Maria Auxiliadora)
(Editór : Manuel Pinto)
