DILI, (TATOLI) – Banku Sentrál Timor-Leste (BSTL) hasai ona notifikasaun ba individu sira ne’ebé mak organiza Talk Fusion hodi hapara sira-nia atividade to’o tempu bainhira hetan lisensa no autorizasaun.
Kompeténsia BSTL haktuir iha artigu 5 no 31 lei númeru 5/2011, juñu 15 kona-ba lei orgánika ne’ebé fó responsavel eskluzivu atu regula, lisensa, rejistu no supervizaun ba atividade finanseira hotu-hotu iha Timor-Leste.
BSTL apela ona ba komunidade atu kuidadu ho atividade ne’ebé hala’o husi indivídu ka kompañia sira liuhusi eskema investimentu tanba atividade ne’e seidauk hetan autorizasaun husi autoridade relevante.
Tuir komunikadu ne’ebé TATOLI asesu ohin katak, atividade ne’ebé seidauk hetan lisensa bele rezulta osan lakon no kontra lei nomós regulamentu sira ne’ebé mak aplika iha país ida ne’e.
Iha informasaun no faktu ne’ebé iha, BSTL nota katak, individu ka empreza balun organiza hela atividade oferta eskema investimentu uza naran Talk Fusion iha Timor-Leste ne’ebé seidauk hetan autorizasaun husi parte relevante.
“Ho nune’e BSTL alerta ba públiku tomak hodi labele investe osan iha kompañia ne’ebé maka seidauk hetan autorizasaun. Ba públiku sira hotu atu proteje ita-boot sira-nia interese, husu atu kuidadu, haree, no verifika didi’ak individuu ka kompañia ne’ebé mak hakbesik aan ba ita-boot no promete oioin hodi husu ita-boot sira atu rai osan ka depozita ou investe ita-boot sira-nia osan”, refere komunikadu ne’e.
Bainhira hakarak investe osan buka hatene tuir empreza ka pesoál ne’ebé oferese eskema investimentu hetan lisensa husi BSTL ka autoridade relevante no rejistu ona sira-nia negósiu ka Servisu Rejistu no Verifikasaun Emprezariál (SERVE) ka la’e.
Jornalista: Maria Auxiliadora
Editora: Rita Almeida
