DILI, (TATOLI)- Koordenadora Komisaun Reforma Fsikál (KRF), Fernanda Borges informa, iha fulan-Outubru, Diresaun Jerál Alfándega sei sai Autoridade Aduaneira no Diresaun Jerál Impostu, sai hanesan Autoridade Tributária.
“KRF sei tulun komisaun instaladora atu harii instituisaun rua ne’e hodi halo prosesu rekrutamentu hamutuk ho Ministériu Finansa atu rekruta ema foun ho kompeténsia iha área téknika hodi bele ajuda implementa lei sira atu nune’e autoridade rua ne’e bele hala’o servisu ho lei ne’ebé iha ona,” Fernanda Borges informa iha Salaun Ministériu Solidariedade Sosiál, ohin.
Autoridade Aduaneira nu’udar odamatan ba prosperiedade nasaun nian, no Autoridade Aduaneira hanesan proteje fronteira Timor nian.
“Autoridade Aduaneira Timor-Leste nian daudaun halo ona reforma hodi responde ba dezafiu krítiku haat ne’ebé sei fó impaktu boot ba tebes ba prosperiedade nasaun iha futuru,” Fernanda Borges esplika.
No dehan, Alfándega mak fatin ba Governu hodi kontrola ba sasán hotu ne’ebé tama no sai, inklui ema, materiál karreta, ró-ahi no aviaun sira nomós fonte rendimentu prinsipál no ajuda atu asegura fronteira nasaun nian.
Alfándega mak rekolla reseita iha fronteira rai-laran, portu no aeroportu no sira mós sei implementa lei tuir fasilitasaun komérsiu.
Aleinde ne’e, Autoridade Aduaneira sei orienta husi valór prinsipál hanesan intergridade, profesionalizmu, transparánsia no respeitu.
Autoridade Tributária sei asegura integridade, profesionalizmu, transparénsia, ho respeitu sei tulun aplikasaun lei ne’ebé konsistente no justu nomós tulun kontribuinte sira, kria ambiente di’ak ba negósiu no haburas ekonomia.
Estabelesimentu Autoridade Tributária mak fó resposta ba nesesidade krexente husi populasaun no ekonomia.
(Jornalista : Maria Auxiliadora)
(Editór : Manuel Pinto)
