DILI (TATOLI)—Komandante Jerál (KJ) Polísia Nasionál Timor-Leste (PNTL), Julio Hornay husu ba komandante munisipiu hotu atu implementa lei no 5/2017 kona ba arma Branka.
“Husu ba komandante munisipiu sira no xefe operasaun sira atu hatene lei arma branka oinsa mak bele implementa iha terenu atu labele falla tanba ita boot sira mak implementadór iha terenu,” Julio Hornay afirma iha nia intervensaun iha Ótel Ramelau, Komoro, Dili, Segunda (05/06).
Atu asegura fallansu iha implementasaun lei arte marsial, ritual, arma branka, rama ambon, ohin (Segunda) Polísia Nasionál Timor Leste organiza seminariu durante loron ida tomak hodi fahe informasaun ba membru PNTL iha teritoriu Timor laran tomak.
Alende komandante munisipiu sira, seminariu ne’e partisipa mós hosi xefe operasaun hosi munisípiu hotu, Prokuradór Jerál Repúblika, Funsionáriu Alfándega, Imigrasaun, Komisaun ba Organizasaun arte marsial, Komandante Unidade Espesiál, Unidade Polísia Fronteira, Unidade Polísia Militar, no Unidade Espesial Polísia.
“Sosializasau ne’e atu habelar informasaun no atu aumenta koñesimentu kona-ba implementasaun lei númeru 5/2017 kona-ba rejime jurídiku relativa prátika arte marsial, rituál, arma branka, rama ambon no alterasaun ba kódigu penál, relasiona ho lei ne’e,” Julio da Costa Hornai esplika.
Hodi observa katak, sidade Dili ohin loron utilizasaun arma branka buras, bazeia ba ne’e mak estadu no governu halo lei hodi hamate eh atua problema sira ne’e tuir lei.
(Jornalista : Zezito Silva)
(Editór : Manuel Pinto)
