DILI (TATOLI)—Asia Fundation ho governu Timor-Leste, sosiedade sivil no setór privadu servisu hamutuk hodi dezenvolve setór turizmu no haforsa ekonomia Timor-Leste (TL), Reprezentativu, Asia Fundation Susan Marx informa.
“Dezenvolve setór turizmu no haforsa ekonomia, liuhosi forum, peskiza, kontribui ba planu merkadu, atu promove timor leste iha nasaun tomak,” Susan Marx esplika ba jornalista sira iha Café Agora, Kampu Alor, Segunda (12/6).
Susan Marx kontente tamba governu TL no parseiru seluk tan, ohin partisipa, atu kolia kona-bá setór turizmu nia kontribuisaun ba TL nia ekonomia.
Liuhosi ajuda governu atu halo polítika di’ak atu dezenvolve no hasae kualidade di’ak ba timoroan nia moris.
Iha fatin hanesan, Diretór Jerál Turizmu, Aquilino Santos Caeiro reforsa, Asia fundation halo forum diskusaun ne’e atu haree kona-bá oinsa dezenvolvimentu turizmu ba oin.
Maske, governu TL iha ona polítika nasional turizmu atu sai hanesan matadalan atu bele dezenvolve iha rai laran.
Maibé, governu sei presiza iha polítika ne’ebé di’ak para bele halo planu estratéjiku, planu asaun bazeia ba polítika ne’e.
Forum diskusaun ne’ebé mak Asia fundation realiza ho tema “Sustentabilidad and inclusive tourism development in Timor Leste” hetan kooperasaun hosi Ministériu Turizmu, Arte no Kultura (MTAK), Ministériu Estadu Koordenadór asuntu Ekonomia (MEKAE) no Gabinete Primeiru Ministru hodi dezenvolve polítika turizmu TL ne’ebé aprova ona iha Konselhu Ministru iha Marsu 2017.
(Jornalista: Julia Chatarina)
(Editór : Manuel Pinto)
