LAUTEM (TATOLI)-Prezidente Partidu Demokrátiku (PD), Mariano Sabino “Asanami” hateten, nu’udar militante no simpatizante PD tenke hahii malu, respeita malu, haku’ak malu ho ema hothotu.
“Ita-nia oan sira halo polítika, iha partidu laran, la’ós ita ba trata, lá,os ita ba ko’alia. La’ós entre ita ko’alia partidu ida ne’e di’ak, ida ne’ebé la di’ak. Ne’e lalika!,” Mariano Asanami, haklaken iha abertura kampana PD nian, iha kampu futebol 28 Novembru, Lautem, Tersa (20/06).
Hodi reforsa katak PD nia funsaun “suku” la’ós “kateri” katak PD eziste atu hadi’a. PD mak unifikadór, fó kontinuidade ba iha mate restu 12 novembru.
Tanba ne’e, PD sira tenke hahii malu hodi garante estabilidade, moris iha ambiente respeitu malu. Vota PD vota estrada, vota PD vota uma di’ak, vota moris di’ak.
Iha fatin hanesan Prezidente CPN (Comissário Polítics Nacional), Partidu Demokrátiku (PD), Adriano do Nascimento informa, PD mai ho slogan ida katak kaer metin ukun rasik aan, harii nasaun husi baze.
Ka’er metin ukun rasik aan signifika PD tau iha ninia ideolojia polítika iha buat tolu, ida tenke iha nasionalizmu, valoriza no hahii funu na´in sira nia obra tanba ne´e mak dehan kaer metin ukun rasik aan.
Seluk mak nasaun ne´e tenke demokrátiku tanba ida ne´e mak ita tenke harii nasaun husi baze, nasaun ida ne´e tenke bazea ba fi’ar katólika, kristaun, musulmanu no seluk tan eh bazea ba fiar no kultura.
Atu konklui nia apela ba militante no simpatizante PD nian katak iha périodu kampaña iha tentasaun barak maibé keta haluha vota nafatin PD.
“Ema sei mai ho osan, mai ho projetu, mai ho pozisaun. Ha´u-nia liamenon mak ne´e, simu ba hothotu han ne´e imi nian, ita hotu nian. Vota PD,” nia konklui.
Entretantu hafoin abertura kampaña PD nian iha Lautem, partidu ne´ebé lidera husi Mariano Sabino “Assanami” ho António da Conceição ne´e sei halo kampaña iha Baucau Vila, Munisípiu Baucau, Ohin, Kuarta (21/06).
(Jornalista: Rafy Belo, Editór : Manuel Pinto)
