DILI (TATOLI)-Ministériu Agrikultura no Peskas (MAP) iha tinan ida ne’e, fulan Novembru sei implementa sensus agrikultura ba dahuluk nian nu’udar programa pilotu ida hodi hadi’a estatístika agrikultura nian.
Sekretáriu Ezekutivu Sensus Agrikultura, Ministériu Agrikultura no Peska (MAP), Claudino Ninas Nabains informa, ba implementasaun programa ne’e MAP aloka ona orsamentu mil $60 ne’ebé tau iha Dotação Todo Governo ne’ebé preparadu ona ba realizasaun sensus pilotu tinan ida ne’e.
“Novembru 2017 Ita hadi’a estatístika agrikultura nian hodi suporta ba planeamentu no alokasaun orsamentu ne’ebé di’ak hodi atinje seguransa ai-han no redús ki’ak,” Claudino informa iha Komoro, Edifisiu MAP, ohin.
Sekretáriu Ezekutivu Sensus Agrikultura, lansamentu ba pilotu sensus agrikultura ne’e iha Novembru 2017 no espera katak ho tempu hanesan sei implementa sensus loloos iha Novembru 2018.
Ho rajaun tenki implementa iha fulan-Novembru 2017 no 2018, tanba hakarak iha tempu hanesan nia agrikultór sira ne’ebé mak fó sira-nia resposta nomós informasaun ne’ebé MAP rekolla iha refleta ba kondisaun agrikultura.
Faze implementasaun sensus sei fahe ba faze haat mak preparativu iha tinan 2016, implementasaun pilotu iha 2017, implementasaun sensus loloos iha 2018 no iha tinan 2017 mak relatóriu sensus nian.
Entertantu ba orsamentu implementasaun MAP hetan mós tulun husi Food and Agriculture Organization (FAO) ho nia deskrisaun ba nesesidade ho montante osan kuaze mil U$300.
Ministru Estanislau Aleixo da Silva hatutan, “Ida ne’e buat ida di’ak tebes tanba ita presiza dadus depois bele halo planemantu ida di’ak.”
MAP agora halo planeamentu bazeia ba dadus ne’ebé MAP iha, maibé dalabarak dadus sira lakompletu no ladún di’ak.
Sensus ida hanesan ne’e, MAP sei bá uma-kain ida-idak liuliu área rurál nian husu ba sira atividade agríkola, saida mak sira iha, kuda no saida mak sira hanoin atu kuda, sasán sira kuda ne’e fó rendimentu hira.
Dadus sira ne’e importante para MAP bele haree vizaun ida klaru kona-ba situasaun reál liuliu agrikultór sira nia situasaun.
(Jornalista : Maria Auxiliadora, Editór : Manuel Pinto)
