DILI, (TATOLI) – Diretór Kooperativa Kafé Timór (CCT-sigla iha Portugés), Sisto Moniz Piedade hatete tinan-tinan CCT halo reabilitasaun ba kafé ho tarjetu tinan ida ba agrikultór kafé hamutuk 3000 no fahe ai-oan nomós kafé oan juta ida atu nune’e agrikultór sira bele kuda nafatin.
Tanba agrikultór barak liu moris ho kafé, nune’e labele halo reabilitasaun dalaida maibé kada tinan reabilita porsentu 25 husi kafé, nune’e bele iha oportunidade atu hetan osan husi kafé ne’ebé mak sei iha.
“Mas kuandu ita tesi nia produsaun kuaze sa’e 200% tanba ita-nia kafé tuan maka’as ona no nia kualidade mós komesa nia musan ki’ikoan ona nune’e ita tenke tesi no kuda mós ai-oan. Hanesan husi Ministériu (MAP) iha tinan kotuk halo mós rabilitasaun kafé kuaze ektare 350”, Sisto informa via telemovel, ohin.
CCT dezde inísiu sempre motiva agrikultór sira atu halo reabilitasaun ba kafé tanba tuan ona no tenke kuda nafatin, hamoos toos tanba maioria agrikultór iha munisípiu lima hanesan Autoridade Munisipál Ermera, Munisípiu Likisá, Aileu, Ainaru no Manufahi moris ho kafé.
“Ita-nia kafé Timór ne’e ita hatene katak tinan ida fó fuan no tinan ida la fó fuan maibé kuandu kafé ida ne’ebé foin sa’e sempre fó fuan nafatin kuandu ita halo reabilitasaun tinan-tinan sempre fó fuan”.
Nune’e husu mós agrikultór sira atu labele kesi animál iha kafé laran para labele estraga tanba barak liu sira husik animál entaun sama kafé oan no ai-oan sira ne’e nomós husu atu plantasaun boot sira ne’e tenke kuidadu, labele tesi no labele halo fali toos iha kafe laran tanba tesi ai-hun sira ne’ebé boot, tempu ida kafé sei lakon.
Uluk iha tempu portugés kafé Timór ne’e bele halo esportasaun to’o tonelada 20 mil tanba kafé ne’e mai husi Fatubesi, Talo no Likisá ne’ebé proteje husi plantasaun boot no fó fuan barak maibé ikus estraga hotu, entaun kafé ne’e komesa menus ona no iha tempu Indonézia bele halo esportasaun to’o de’it tonelada 10 mil no iha tempu agora másimu tonelada 8 ka 10 mil. Nune’e kuandu lakuidadu kafé ne’e sei menus ba beibeik.
Jornalista: Maria Auxiliadora
Editora: Rita Almeida
