DILI, (TATOLI) – Ministru Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva informa Banku Nasionál Komérsiu Timor-Leste (BNCTL-sigla iha portugés), Caixa Geral Depósito no Banku Mandiri prontu atu loke kréditu liuhusi sistema garantia bankária.
“Ha’u fiar katak agora iha millaun haat, ne’e hanesan garantia ne’ebé Governu tau atu hatún taxa juru, funan ne’ebé atu selu filafali ne’e tun, ne’e duni setembru implementa ona, ha’u hanoin sei fó oportunidade di’ak para ita-nia mikro pequena (kiik) empreza bele habelar sira-nia knaar para hala’o atividade di’ak liután”, Estanislau hatete iha Palásiu Governu, ohin.
Estanislau akredita Governu Konstitusionál dahituk sei tau osan boot liután no halo tan servisu balun para asegura osan ne’e iha banku hodi habelar kréditu ba timoroan sira ne’ebé hakarak halo negósiu.
Sistema garantia bankária ne’e, Governu tau osan depois negosia ho banku sira ne’ebé aseita risku ne’ebé iha no sistema ne’ebé Governu tau.
“La’ós banku hotu obrigadu, banku sira ne’ebé aseita ida ne’e Governu fó kobertura porsentu 70 ne’e duni sira sei lalakon osan mas ema ne’ebé empréstimu ne’e tenke hatene nia bá empresta osan banku nian la’ós osan Estadu nian, bainhira prezuiju ruma mak Estadu bele fó kobertura mas ida ne’e tuir regulamentu hotu no ema ne’ebé halo empréstimu tenke prienxe rekizitu ne’ebé iha para depois banku mós labele lakon osan”.
Banku sei la fó empréstimu arbiru maibé prioridade boot ba negósiu ki’ikoan sira, agrikultura, ba ema ne’ebé halo negósiu iha área rurál, iha setór produtivu no ida ne’e inisiativa ida di’ak tebes no halo timoroan sira bele hetan asesu ba kapitál hodi hala’o negósiu hodi dezevolve Timor-Leste.
Jornalista: Maria Auxiliadora
Editora: Rita Almeida
