DILI, (TATOLI) – Governu da-hituk liuhosi Ministériu Administrasaun Estatál (MAE) mai ho programa prioridade mak reforma administrasaun lokál liuliu haree fila fali lei hirak ne’ebé durante ne’e ladauk kompleta.
“Ministériu Administrasaun Estatál (MAE) tenke revee fali lei hirak ne’ebé antes ne’e governu anteriór laduak kompleta hanesan lei divizaun administrativa teritóriu no dekretu lei hirak ne’ebé ko’alia kona-ba administrasaun, administradór no autoridade nian”, hatete Ministru MAE, Valentim Ximenes ba ajénsia Tatoli hafoin halo vizita dahuluk ba Sekretariadu Tékniku Administrasaun Eleitorál (STAE) iha Kaikoli, ohin.
Nia akresenta, importante liu mak prepara uluk lei baze ba dezentralizasaun no podér lokál ho intensaun katak atu fó dalan hodi halo eleisaun munisipál.
Molok prepara lei baze dezentralizasaun no podér lokál, MAE presiza kompleta lei finansa lokál no lei eleisaun munisipál nian.
Nia salienta, eleisaun dalaruma akontese iha 2022 ne’ebé fó prioridade ba munisípiu hirak ne’ebé preparadu ona no halo neneik ho fazeadamente.
Enkuantu, naran distritu muda hotu ona ba munisípiu maibé la’os munisípiu dezentralizadu maibé deskonsentrasaun.
Nia afirma, governu anteriór bolu dehan munisípiu ho delegasaun kompeténsia, tuir planu governu agora nian mak prepara lei, prepara kondisaun ba kuadru administrativa atu bele halo eleisaun direita, eleisaun kamara munisipál, eleisaun asembleia munisipál iha tinan 2022.
Jornalista: Zezito Silva
Editora: Rita Almeida
