DILI, (TATOLI) – Akadémiku husi Universidade Orientál Timor Lorosa’e (UNITAL), Alváro da Silva hatete governu da-hitu ne’ebé lidera husi Primeiru-Ministru, Marí Alkatiri tenke esforsu hodi konvense deputadu sira iha Parlamentu Nasionál (PN).
“Programa ne’e importante, kestaun mak governu minoritáriu hasoru hela bloku boot ida ho 35 kadeira iha Parlamentu. Governu ezekuta programa ida tenke pasa iha Parlamentu Nasionál, ita-nia sistema mak hanesan ne’e duni”, Dekanu Fakuldade Siénsia no Polítika UNITAL ne’e komenta ba Tatoli iha kampus UNITAL Bekora, ohin.
Programa ne’ebé aprezenta foka liu ba nesesidade bázika povu nian, hanesan edukasaun, saúde no seluk tan. “Se governu ne’ebé mak mai ho minoria, dalan mak tenke esforsu maka’as para atu konversa ho Parlamentu Nasionál”, realsa.
Tuir nia, artigu 109 (Apresiasaun ba Governu nia Programa) katak, governu husu ba parlamentu atu vota konfiansa mak konkordánsia polítika entre bankada sira iha parlamentu para depois bele vota.
“Ida ne’e mak difikuldade boot ba governu ne’ebé agora lidera husi ita-nia Primeiru Ministru, Marí Alkatiri tenke esforsu maka’as, se lae programa bele di’ak maibé se polítika la apoiu, difísil atu pasa”, hatutan.
Nia dehan, sistema Nasaun nian mak parlamentu ne’ebé forte, bele asegura estabilidade governativa. Dalan agora atu asegura, oinsá polítika governu nian liuhusi programa sira ne’e tenke pasa.
Ho situasaun polítika ne’e, tuir nia, maturidade povu nian mak tenke hakmatek hodi fó konfiansa ba deputadu sira. Agora, depende deputadu sira atu ezerse funsaun hanesan reprejentante povu.
Fiar metin katak ita-nia deputadu sira sei halo sasan ne’ebé mak di’ak, deside buat ne’ebé mak di’ak hodi reprezenta ita, katak tan.
“Tanba ne’e mak ha’u dehan, ita-nia estadu presiza hela ita-nia estabilidade ida ne’ebé di’ak para depois ita la’o. Governu mak tenke haree oinsá mak bele diskute ho ita-nia deputadu sira ne’ebé iha depois bele hala’o apoiu sira-nia serbisu”, afirma.
Nia mós kongratula membru governu sira. “Timoroan sira ne’ebé simu kargu, ha’u apresia no kongratula ba sira-nia desizaun atu envolve iha governasaun”, apresia.
Jornalista: Rafy Belo
Editora: Rita Almeida
