DILI (TATOLI)-Parókia Motaél harii ona uma hamutuk sanulu resin ida (11) ba ema kbiit laek iha Hudi laran depois muda ba Fatu meta, muda mai Bébora i remata ho Cacau Lidun. uma tolu iha Hudi Laran, uma rua iha Fatumeta, uma tolu iha Cacau Lidun, uma rua iha Bebora.
Informa Padre Paróku Motael, Pe. David Alves da Conceição perante sarani no komunidade sira iha aldeia Manufuik Ai-tarak laran, suku Kampu Alor, Díli, Domingu (07/01) bainhira atu fó bensa no entrega uma ba kbiit laek Domingas dos Santos ne’ebé harii ho apoiu husi Joven Grupu Voluntarizmu (JGV), komunidade, autoridade lokál no grupu rezervada kapela São José Operáriu, Ai-tarak laran.
“Ha’u hakarak atu dehan ba imi katak tinan tolu resin iha parokia Motael, ha’u halo uma 11, loloos 12, ha’u-nia mehi katak se ita hahú, hahú dia um novembru fó sai iha Parokia, kapela ida ida halo uma ida ida ba família kbiit laek ida ida ka sentru pastorál ida-idak ninian, novembru, dezembru mosu uma 13 iha sentru pastorál 13,” amu ne’e akresenta.
Hodi hatutan: “Ne’e mak ha’u mehi maibé ikus mai kapela Ai-tarak laran imi konsege lori liafuan ne’e halo netik’’.
Pe. David Alves da Conceição reforsa katak nia mehi atu harii uma 13, ida mak konsege harii husi voluntáriu eh joven sira enkuantu 12 nia rasik mak lidera hamutuk ho autoridade igreja nian hanesan apostuladu orasaun, ho grupu karismátiku igreja ninian no seluk tan.
Nia mós informa katak osan sira ne’ebé nia uza hodi harii uma ba kbiit laek ne’e mai husi osan matebian sira, ne’ebé sarani husu misa iha igreja Motael.
Katak, husi osan sira ne’e mak hanesan padre iha igreja Motael, sira moris ho ida ne’e inklui mós frater sira, ne’e primeiru.
Segundu, osan matebian sira ne’ebé uza dalaruma liu tiha fali nesesidade tanba ne’e fahe mós ba setór seluk hanesan selu funsionáriu sira iha parókia.
Terseiru mak ajuda kbiit laek sira hodi halo sira-nia uma nomós selu estudante sira ne’ebé husu tulun ba Parókia Motael no hela iha ne’ebá.
“Ho osan matebian ha’u bele rejista uma 11 ho estudante sira ha’u la sura ida. Kuandu ha’u iha ha’u fó, kuandu ha’u la iha ha’u la fó. Selu estudante ha’u la hanoin barak,” nia informa.
Maske nune’e nia haktuir katak bainhira ajuda ema seluk, sei iha ema balun ne’ebé koko atu ba bosok tanba ne’e amu paróku ne’e buka husu ba nia konsiénsia rasik molok foti desizaun atu ajuda ema ruma ne’ebé mosu teki-teki ba hodi husu tulun, tan bele prejudika fali ema seluk ne’ebé presiza tebes ajuda duni. “Ida ne’e mak ha’u-nia pena, ha’u-nia kuitadu,” nia suspira.
Padre Paróku Motael, Pe. David Alves da Conceição informa katak iha tempu badak nia sei muda ba fatin seluk tanba ne’e nia husu nafatin ba komunidade sira atu iha sensibilidade nafatin ba ema ki’ak sira tan nu’udar padre, sira bele tama no sai maibé la lori ho ki’ak sira. Ki’ak hela metin nafatin iha komunidade nia leet.
“Ami padre sira, tama no sai, maibé ema ki’ak sira hela metin ho ita-boot sira. Sira la tama ho ami, la sai ho ami. Janeiru nia laran ha’u sai ona, ema ki’ak ha’u la lori, ha’u-nia preokupasaun ba ema ki’ak ha’u la lori ida. Ha’u mai rai hela de’it edukasaun ba ita-boot sira,” padre ne’e realsa.
Nia akresenta tan, nia preokupa, nia halerik no dalaruma tanis bainhira haree ema la tau-matan ba família eh ema ki’ak sira, maske nune’e bainhira nia sei muda ba fatin seluk sei hala’o nafatin misaun ida hodi ajuda ki’ak sira.
“Ha’u tulun ema la’ós ha’u iha maibé tanba ha’u-nia fuan, ha’u halo hanesan padre, sei kontinua halo, bainhira iha no ba ne’ebé de’it,” nia promete.
Tan ne’e, amu Paróku Motael ne’e, fó hanoin katak ba komunidade no sarani sira ne’ebé iha ai-han natoon, iha hahan sufisiente atu keta estraga no presiza nafatin hanorin oan sira atu hadomi hahan. Basá, dalaruma ita estraga hahan, iha fatin seluk, ema seluk araska no kuran hahan no buka tebes tulun husi ema seluk.
Nune’e mós, bainhira iha osan, buka ajuda mós kbiit laek eh ki’ak sira no osan ne’ebé iha, ajuda husi ema seluk atu ita tulun ema seluk iha karik presiza uza ho didi’ak.
“Osan buat di’ak tulun ema seluk maibé mós halo fo’er ema nia naran.Kuandu ita uza sala ema tetak ita, ita dois liu fila fali tahu.Buat ne’ebé di’ak halo di’ak nafatin. Ema seluk bele dehan ita, ema seluk bele hateten ita,” nia enkoraja.
(Jornalista: Rafy Belo)
(Editór : Manuel Pinto)
