DILI, (TATOLI) – Sekretáriu Estadu Juventude no Traballu (SEJT), Nívio Leite Magalhães, informa SEJT sei fó sai anúnisu ba públiku sobre rejistrasaun vaga ba traballadór Korea no Austrália iha semana ida ka rua tan no avizu ne’e sei fó sai iha territóriu Timor-Leste laran tomak atu nune’e joven sira bele kompete hotu.
“Agora daudaun rejistrasaun seidauk loke tanba ha’u husu ona diretór no xefe departamentu sira atu halo fali avaliasaun ba programa ne’e tanba tenke anúnsiu ba públiku iha territóriu tomak no atu asegura katak selesaun tenke ho transparente”, dehan Nívio hafoin enkontru Konsellu Ministru iha Palásiu Governu, ohin hodi responde ba joven sira ne’ebé husu informasaun kona-ba rejistrasaun nian.
Hatutan bainhira trabaladór ida ne’ebé selesionadu no hetan oportunidade bá halo serbisu iha fatin sira ne’e tanba nia iha kapsidade atu bá iha rai-liur nu’udar traballadór husi Timor-Leste.
“Husu ba traballadór sira karik selesionadu maka sira bá la’ós reprezenta de’it sira-nia an, maibé hanesan reprezentante nasaun nian iha ne’ebá tanba buat ruma ne’ebé iha ne’ebá la’o laloos ema sei latemi A ka B maibé timoroan”.
Sobre anúnsiu ne’ebé sei hato’o iha territóriu tomak, SEJT iha nia reprezentasaun kada munisípiu mak sei informa nomós liuhusi mídia kona-ba kestaun ida ne’e.
Númeru vaga ba serbisu-na’in sira ne’e seidauk hatene tanba depende husi Korea no Austrália mak deside ema na’in hira mak atu bá.
“Ami-nia papél maka prosesu hotu tenke loke ba públiku no avaliasaun ne’e tenke halo ho transparente signifika katak selesaun ida ne’e laharee ba grupu, família no kór polítiku, maibé ida ne’e loke ba timoroan”.
Jornalista: Maria Auxiliadora
Editora: Rita Almeida
