iklan

NASIONÁL, DILI, MUNISÍPIU

Evita Isin Rua Iha Australia, SEJT Enkontru Ho Traballadór Feto 8

Evita Isin Rua Iha Australia, SEJT Enkontru Ho Traballadór Feto 8

SEJT, Nívio Leite Magalhães. Foto / Egas Cristovão.

DILI (TATOLI)— Sekretáriu Estadu Juventude no Traballu, Nívio Leite Magalhães, Segunda (29/01), ohin, iha nia servisu fatin realiza enkontru ho traballadora na’in 8 ne’ebé tempu badak sei ba Australia nu’udar traballadora.

Objetivu enkontru ne’e hanesan halo verifikasaun (cross check) ba sira atu asegura katak kandidatu sira ne’e tuir duni teste no merese atu bá. Aleinde ida ne’e mós hanesan antesipasaun ida atu labele akontese kazu grávida hanesan traballadora timoroan ida ne’ebé liu selesaun bá hala’o serbisu iha Austrália sein hala’o teste médiku.

“Enkontru ne’e atu ko’alia ho sira nó mós sira-nia família katak SEJT kontinua ho programa ne’e, maibé sira ne’ebé bá tenke liuhusi selesaun ida ne’ebé loos. Ha’u rasik sei konfirma filafali rezultadu selesaun no rezultadu teste no relatóriu ne’ebé tama, ne’e importante tebes tanba sei laiha toleránsia ba korrupsaun, koluzaun no nepotizmu iha programa saida de’it ne’ebé sei implementa iha SEJT”, katak Nívio hafoin hala’o soru mutuk ho kandidatu traballadora Austrália no família sira iha Kaikoli, ohin.

Liuhusi enkontru ne’e tanba kandidatu sira liu ona selesaun no SEJT sei haree filafali selesaun ne’e la’o ho loos tanba prova hatudu ona katak traballadora na’in-ida ne’ebé bá Austrália lá tuir teste médiku.

“Ida ne’e labele, sé de’it mak bá iha Austrália tenke liuhusi selesaun ida ne’ebé justu no loos, tanba programa ida ne’e ba timoroan hotu no sira ne’ebé bá merese duni atu bá la’ós tanba sira família ka grupu ida ka kór ida. Hanesan governante ha’u tenke asegura duni ida ne’e katak programa hotu iha SEJT halo ho transparente”.

Bainhira iha prosesu verifikasaun mak rezultadu hatudu balun lá tuir teste maka sei kansela atu bá maski iha ona ticket, visa bá Australia.

“Sira labele bá nafatin tanba sira lá merese atu bá, tanba ne’e mak ami sei kontinua atu hadi’a programa ne’e no investigasaun sei la’o hela ba programa ida ne’e atu buka hatene sé loos mak responsabiliza ba irregularidade ne’ebé akontese iha semana hirak liubá”.

Traballadora na’in-ualu ne’e sei substitui traballadora na’in-ida ne’ebé sei fila mai Timor-Leste no sei arranka iha loron 2 Fevereiru.

(Jornalista : Maria Auxiliadora)

(Editór : Manuel Pinto)

iklan
iklan

Leave a Reply

iklan
error: Content is protected !!