DILI, (TATOLI) – Xefe Bankada Frente Revolusionária Timor-Leste Independente (FRETILIN), Francisco Branco, klarifika rezultadu votu horisehik ba meza komisaun permanente Parlamentu Nasionál mak FRETILIN sempre kaer prinsípiu igualdade jéneru no hakarak konfigurasaun meza PN tenke iha reprezentante forsa polítika hotu.
“Atu klarifika rezultadu votasaun horisehik iha loron dahuluk reuniaun komisaun permanente hahú ninia kna’ar atu hili sekretária no vise sekretária meza komisaun permanente, tamba ami nia partidu sempre hili igualdade jéneru iha polítika no desde uluk kedan ami hakarak konfigurasaun meza Parlamentu Nasionál sempre iha reprezentasaun forsa polítika hotu”, tenik iha konferénsia imprensa iha PN, ohin.
Tuir Branco deputadu tolu ne’ebé vota a favór ne’e ho konsiénsia no tuir prinsípiu ne’ebé nia igualidade jéneru no forsa polítika.
Hodi fó razaun bankada koligasaun ne’ebé kompostu husi FRETILIN no Partidu Demokrátiku (PD) la aprezenta lista kandidatura tanba hakarak fó oportunidade ba konfigurasaun meza komisaun permanente tuir saida mak defende desde uluk no hetan reprezentasaun husi Partidu Polítiku (ParPol) seluk.
“Ida ne’e mak ami hakarak no horisehik prosesu aprezentasaun kandidatu ami la aprezenta”, afirma hodi konfirma votu a favór tolu horisehik mai husi deputadu bankada FRETILIN.
Entretantu, rezultadu votasaun ba lista únika husi bankada opozisaun (CNRT, PLP no KHUNTO), ba kargu sekretária no vise sekretária meza komisaun permanente passa ho votu a favór 19, kontra hitu no abstensaun tolu husi deputadu 29 ne’ebé hola parte iha komisaun permanente.
Ho votu sekretu, finalmente Deputada Maria Terezinha husi bankada CNRT eleitu ba kargu sekretária no deputada Signi Candrawati husi PLP eleitu ba kargu vise sekretária meza komisaun permanente.
Nune’e kompozisaun meza komisaun permanente iha hotu reprezentante husi partidu lima ne’ebé hetan asentu iha PN.
Prezidente PN, Aniceto Guterres (FRETILIN) no Vise Prezidente rua mak Júlio Meta Malik (PD) no António Verdial (KHUNTO).
Deputadu sira ne’ebé iha komisaun permanente kompostu husi deputadu FRETILIN 10, CNRT 10, PLP haat, PD tolu no KHUNTO rua.
Enkuantu deputadu bankada opozisaun nain 16 mak partisipa iha komisaun permanente no nain 13 husi bankada opozisaun maibé rezultadu votasaun horisehik hatudu rezultadu a favór 19.
Jornalista: Julia Chatarina
Editora: Rita Almeida
