Ministru Justisa Sosial no Empoderamentu India Sei Vizita TL
DILI (TATOLI)—Ministru Estadu ba Asuntus Justisa Sosial no Empoderamentu India, KRISHAN PAL GURJAR, akompaña husi Embaixador non residensia India mai Timor-Leste, iha loron 07 -10 Abril 2018, sei halao vizita trabalho mai Timor-Leste.
Vizita trabalho ida ne’e sai hanesan vizita primeiru hosi autoridade aas India nian mai Timor-Leste. Objetivu hosi vizita ne’e atu hametin liutan relasaoes bilaterais entre Timor-Leste ho India.
Durante iha Timor-Leste Ministru Estadu ba Asuntus Justisa Sosial no Empoderamentu India ne’e sei halao mos vizita kortezia ba S.E. Presidente da Repúblika Timor-Leste Dr.Francisco Guterres Lu olo, no sei hasoru mos S.E. Primeiru-Ministru Timor –Leste
Dr. Mari Alkatiri. Iha mos programa atu Ministru Estadu ne’e sei halao mos enkontru ho Ministru Negósiu Estranjéiru no Kooperasaun S.E. Prof. Dr. Aurelio Guterres, iha MNEK. Enkontru prinsipal sei ho Ministra Justisa Timor-Leste nian nebe sei sai hanesan homologu ba Ministru Indian nian.
Alende de enkontru bilateral no vizita kortezia hirak ne, sei iha mos assinatura MoU entre Timor-Leste ho India iha Area Saude. Iha assinatura ne’e husi parte Timor Leste sei representa husi S.E. Prof. Dr. Aurelio Guterres, Ministru Negósiu Estranjeiru no Kooperasaun e husi parte India S.E.KRISHAN PAL GURJAR, Ministru Estado ba asuntus Justisa sosial no Empoderamentu maka sei asina. Sei iha mos MoU balun hanesan iha área ICT, Comercio nebe oras ne sei negosia hela.
Ministru Estadu ba asuntus Justisa sosial no Empoderamento S.E. Sr. KRISHAN PAL GURJAR ho nia delegasaun sei fila hikas ba India iha loron 10 –Abril 2018.
(CI)
