DILI, (TATOLI) – Embaixadór Repúblika Indonézia iha Timor-Leste (TL), Sahat Sitorus, liuhosi semináriu ne’ebé realiza hosi Timor-Leste Press Uniaun (TLPU) ho tema “Papél Mídia Iha Eleisaun Antesipada” husu jornalista sira atu haburas demokrásia liliu iha eleisaun antesipada parlamentár.
“Papél mídia importante tanba mídia hola parte atu haburas demokrásia”, hatutan Sahat iha nia intervensaun ohin iha edifísiu Kultura Indonézia nian Mascarenhas.
Nune’e, mídia iha TL sai fatór determinante atu halo kontrolu sosiál, tanba la iha mídia buat hotu iha nakukun laran.
Ezemplu, iha Indonézia ema barak tauk mídia maibé tuir loloos ema ida-idak tenke halo parseria ho orgaun komunikasaun sosiál atu servisu ho mídia, hodi bele fó informasaun ne’ebé loloos.
Tanba ne’e, mídia hola parte buat ba informasaun ne’ebê kredivél ba públiku atu povu bele fiar kualker situasaun atuál.
Iha fatin hanesan, Diretór Nasionál Programa Nasoen Unida ba Dezenvolvimentu (PNUD) iha Timor-Leste, Claudio Boavida, akresenta mídia importante atu fó hatene saida mak loos ba públiku, liliu iha ámbitu kampaña eleitorál no eleisaun antesipada.
Haktuir tan katak informasaun ne’ebé espalladu iha mídia sosiál halo ema ladun fó fiar tanba ne’e mídia bele halo Clearing House, atu públiku bele hetan informasaun ida loloos.
Atu haburas demokrásia, eleisaun antesipada nu’udar espasu ba mídia atu livre no respeita lei hodi kontribui ba prosesu dezenvolvimentu nasionál.
Iha semináriu ne’e organiza hosi TLPU no hetan prezensa hosi Sekretáriu Estadu Konsellu Ministru no Komunikasaun Sosiál, Matias Boavida, parseria internasionál, embaixadór Indonézia no Japan, Prezidente Board RTTL.EP, Gil da Costa, reprezentante sira Konsellu Imprensa inklui diretór mídia, nain ba mídia no jornalista sira iha TL.
Jornalista: Zezito Silva
Editora: Rita Almeida
