iklan

INTERNASIONÁL, EDUKASAUN, DILI, MUNISÍPIU, OÉ-CUSSE (RAEOA)

Labarik Barak iha Timor-Leste Seidauk Hetan Atensaun Másimu

Labarik Barak iha Timor-Leste Seidauk Hetan Atensaun Másimu

Presidenti da Republika Francisco Guterres Lu Olo ho nia espouza foto hamutuk ho estundantes sira wainhira partisipa iha selebrasaun loron Mundial labarik nian iha Palacio Presidenti Aitarak Laran, Dili 1 Juinu 2017.Foto TATOLI/Antonio G

DILI, (TATOLI) – Organizasaun KADALAK observa katak labarik barak iha Timor-Leste seidauk hetan atensaun másimu husi inan-aman sira, liliu kona-ba edukasaun oan sira nian. Nune’e sujere, inan-aman, Ministériu Edukasaun (ME), sosiedade, tau atensaun másimu ba situasaun labarik sira nian, tan konsidera labarik futuru nasaun ne’e nian.

“Inan-aman sira apenas lori oan sira tau naran ‘hatama iha eskola’ maibé bainhira iha TPC, inan-aman sira laiha tempu atu fó hanoin ka tulun oan sira no bainhira atu simu kaderneta, inan-aman sira balun la preokupa; barak mak la ba, até haruka fali bin ka tiun ka ema seluk ne’ebé labarik ne’e koñese mak ba simu. Atitude ne’e barak akontese iha Timór”, dehan prezidente Kadalak, Natalino de Jesus Dias, ba Ajénsia TATOLI, ohin, via telefone.

Natalino hatutan, labarik sira-nia preparasaun aban atu estuda matéria saida, fila husi eskola aprende ona matéria saida, inan-aman laduun preokupa no dalaruma baruk atu hatene.

“Iha Díli laran, labarik barak mak fa’an sasan iha fatin publiku. Labarik barak mak abandona nia eskola, fa’an sasan iha luron, trotoar leten, merkadu (Taibesi, ect), iha Palácio do Governo nia oin, Páteo, TP-Timor Plaza, Leader, balun mós fase kareta. Atividade sira ne’e sira halo atu tulun sira-nia inan-aman, maibé balun baruk atu ba eskola ho razaun oioin,” komenta ezekutivu organizasaun non-luktrutivu ne’e.

Situasaun ida ne’e akontese, tuir nia, tanba inan-aman sira balun menus kuñesimentu, seidauk ezekuta papel nu’udar edukadór dahuluk ba oan sira ho ativu no sériu no seluk kauza tanba kaben sedu, nune’e sein planu familia.

Tanba ne’e, Prezidente KADALAK, Natalino de Jesus Dias sujere, iha futuru, inan-aman, profesór sira, Ministériu Edukasaun atu tau-matan liutan ba labarik sira. Husi eskola, kria kondisaun hanesan uma segundu ba labarik sira atu aprende.

Ba inan-aman sira, kria uma hela hanesan eskola primeira, ho efetivu atu tulun labarik sira, motiva sira bele ativu liutan ba eskola.

Ba ME, bele mellora kondisaun ba labarik sira, kria mós lei forte ida ba inan-aman sira ne’ebé abandona oan sira-nia eskola ka husik oan ho sira-nia menoridade ba buka osan hodi sustenta família.

“Iha parte seluk mós investe maka’as liutan ba labarik sira liuhusi Ministério da Educação. Labarik sira mak futuru nasaun ida ne’e. Mai ita hotu fó atensaun másimu ba sira; familia, eskola, sosiedade, sai hanesan pilar importante ba dezenvolvimentu labarik ida nian. Matenek iha fiar no koñesimentu sei garante Timor ida di’ak liu, iha aban bainrua,” hateten prezidente KADALAK, Natalino de Jesus Dias.

Antes ne’e, reprezentante UNICEF (United Nation International Children Fund), iha Timor-Leste, Valerie Taton akresenta katak iha TL, iha labarik rihun 275 ho tinan walu mai karaik, tanba ne’e atu garante servisu sira hotu, importante mak atu iha prestasaun koordenasaun servisu; inklui saúde, nutrisaun, prátika ijiéne, estimulasaun sedu, interasaun sosiál no emosaun ho kuidadór sira, halimar, oportunidade aprende, no protesaun husi violénsia.

Ho esforsu koletiva husi governu de’it, sosiedade sívil, família no kuidaddór sira mak bele halo ne’e akontese. Governu bele dezempeña papel importante liuhusi investigasaun urjente ba labarik sira, espesialmente sira ne’ebé nesesitadu ba hahú moris di’ak.

“Profisionál media sira, ita-boot sira bele dezempeña papel importante atu hasa’e konsiénsia ba asuntu ne’e. Ami iha atu apoiu ita-boot sira,” garante reprezentante UNICEF, Valerie Taton.

Jornalista: Rafy Belo

Editora: Rita Almeida

iklan
iklan

Leave a Reply

iklan
error: Content is protected !!