TL-Brazil Kontinua Hametin Koperasaun iha Setór Justisa
DILI, (TATOLI) – Xefe Defensória Públika Jerál, Sergio Hornay, hateten Governu Brazil nafatin iha kompromisu apoiu kapasitasaun rekursu umanu ba defensór públiku sira iha Timor Leste hodi hadi’a di’ak liután setór justisa.
Sergio Hornay hato’o asuntu ne’e durante akompaña delegasaun Defensória Públiku Jerál Brazil ne’ebé lidera hosi Carlos Paz no Embaixadór Brazil ba Timor Leste, Aldemo Garcia, bainhira hasoru malu ho Primeiru-Ministru, Marí Alkatiri, iha Palásiu Governu ohin.
“Tanba ne’e visita defensória Públiku Jerál Federal Brazil ohin atu hametin tan lasu koperasaun metin liu hodi esplora koperasaun hodi hametin setór Justisa”, hateten Sergio Hornay ba jornalista sira.
Tuir Sergio Hornay alvu koperasaun hosi governu Brazil ba setór justisa maka formasaun no kapasitasaun ba kuadru Defensoria Públika, prokuradór, juiz sira iha sentru formasaun jurídika judisiáriu Timor-Leste.
ʺSira manifesta prontidaun para apoiu setór justisa, liuliu iha defensoria públika”, tenik.
Embaixadór Aldemo Garcia hateten Governu rai rua estabelese ona koperasaun iha setór oi-oin hahú 1999 to’o ohin.
“Iha 2005 defensór públiku Brazil mai iha Timor-Leste hodi apoiu setór justisa no defensór públiku timoroan ba Brazil hodi hetan formasaun téknika”, hateten diplomata Brazileiru ne’e.
Embaixadór konsidera koperasaun ne’e hetan ona susesu lubuk ida, tanba ne’e sei kontinua hametin liután.
Jornalista: Agapito dos Santos
Editora: Rita Almeida
