DILI, (TATOLI) – Prezidente Repúblika (PR), Francisco Guterres Lú Olo, sei hala’o vizita traballu ba Jakarta, Indonézia, kuarta (27/6) no sei fila hikas mai Timor-Leste (TL) iha sábadu (30/6).
Objetivu vizita ba Indonézia, Xefe Estadu esplika liuhusi nia deskursu iha seremónia tomada pose ba membru VIII Governu Konstitusionál iha Palásiu Nobre Lahane, semana kotuk, katak atu hasa’e liu-tan kooperasaun bilaterál no multilaterál.
“Iha fulan ida ne’e nia laran, ha’u sei halo vizita Estadu ba Jakarta no sei hato’o ita-nia povu ninia hako’ak boot, dala ita tan, ba povu indonésiu. Ha’u sei serbisu hamutuk ho Governu Indonéziu atu hasa’e liu-tan ita-nia kooperasaun bilaterál no multilateral”, katak Lú Olo.
Xefe Estadu haktuir ohin loron TL halo relasaun di’ak tebe-tebes ho paíz viziñu sira hanesan Indonézia no Austrália, atu haforsa amizade no relasaun ekonómika entre nasaun sira no harii dezenvolvimentu ida iha rejiaun.
“Timor-Leste haka’as-án hela atu tama ba ASEAN, asosiasaun harii husi nasaun sira, iha ita-nia rejiaun. Tanba ita haka’as-án hela atu tama iha ASEAN, ita hatudu povu nia interese maka’as atu ajuda mós haburas no hametin seguransa, ambiente hakmatek no relasaun di’ak entre país sira, iha ita-nia rejiaun”, afirma.
Lú Olo hatutan TL la’ós hetan susesu de’it ho país sira halo parte ASEAN, maibé ho mós komunidade nasaun sira seluk nian hanesan Xina, Japaun, Repúblika Koreia, Estadus Unidus, Uniaun Europeia liu-liu Portugal, Brazíl no país sira seluk ne’ebé halo parte iha Komunidade Nasaun sira ne’ebé ko’alia lian portugés (CPLP).
Nia tenik Timor-Leste mós halo parseria multilaterál ho ONU iha tinan rua nulu ikus liu nia laran, liuhusi dalan oi-oin no hetan susesu boot iha planu operasaun hodi tanen metin pás no iha prosesu harii no hametin instituisoens Estadu.
Jornalista: Xisto Freitas
Editora: Rita Almeida
