iklan

NASIONÁL, DILI, MUNISÍPIU

SEJT Sesante Husu ba SEFOPE Atu Kontinua Serbisu Ne’ebé Seidauk Remata

SEJT Sesante Husu ba SEFOPE Atu Kontinua Serbisu Ne’ebé Seidauk Remata

Sekretáriu Estadu Juventude no Traballu (SEJT) sesante, Nívio Leite Magalhães ka'er lima ho Sekretáriu Estadu Formasaun Profisionál no Empregu (SEFOPE), Julião da Silva. Foto Facebook.

DILI, (TATOLI)-Sekretáriu Estadu Juventude no Traballu (SEJT) sesante, Nívio Leite Magalhães, entrega ona relatóriu no serbisu hotu ba Sekretáriu Estadu Formasaun Profisionál no Empregu (SEFOPE), Julião da Silva, iha Governu Konstituisonál Daualuk nian no husu atu kontinua serbisu ne’ebé seidauk remata.

“Parabéns ba membru Governu Konstitusionál daualuk nian no partikularmente SEFOPE. Votu susesu durante mandatu hodi hamutuk hamentin nasaun ba povu nia moris di’ak”, Nívio hato’o ida ne’e iha serimónia entrega relatóriu iha SEFOPE, Kaikoli, ohin.

Nívio relata durante mandatu Governu Dahituk programa lapasa no orsamentu laiha, tanba ne’e iha fulan sia nia laran kontinua de’it programa (VI) Governu anteriór nian.

“Tanba programa ne’e boot tebes, prepara ba tinan  lima ami mós foti de’it área haat ne’ebé liga ba Juventude, Traballu, Formasaun Profisionál no Empregu atu nune’e bainhira remata mandatu karik bele mós iha rezultadu ruma atu aprezenta ba membru Governu foun”.

Durante asume nia knaar iha desizaun balun ne’ebé foti  no laiha hanoin atu ofende funsionáriu sira. “Bainhira ha’u husik hela fatin ida ne’e sei laprejudika ita-booot sira. Ezemplu mak atu muda karreta no motór ho xapa matríkula privada ba Governu nian. Desizaun balun ne’ebé foti atu hadi’a filafali serbisu iha empregu esteriór. Desizaun ne’e foti tanba ita tenke hadi’a no buat barak mak seidauk realiza hotu, tanba ne’e ha’u hein SEFOPE bele kontinua serbisu ne’ebé karik seidauk remata”.

Ida ne’e importante tebes hodi asegura katak instituisaun ida ne’e bele serbí di’ak povu no nasaun no espera SEFOPE sei hakat bá oin ho esperansa boot hodi realiza programa sira hotu ne’ebé planea ona.

Iha realtóriu ne’ebé hato’o iha rekomendasaun lubuk ida hanesan reabilita edifísu no haree ba moris funsionáriu permanente no kontratadu nomós fasilidade serbisu no seluk tan.

“Ha’u hato’o ba sekretáriu Estadu atu haree ba formasaun ba funsionáriu sira, no rekomendasaun lubuk ida no hein katak bele fó antensaun”.

SEFOPE, Julião da Silva, dehan ba rekomedasaun hotu ne’ebé iha no buat ne’ebé SEJT hala’o ona no pozitivu ba povu no nasaun la moe atu hatutan ida ne’e.

“Programa sira ne’ebé la’o ona no seidauk remata ita tenke kontinua ida ne’e. Ita espera tinan lima ne’e ita lori SEFOPE ba to’o iha munisípiu”.

 Jornalista : Maria Auxiliadora

Editór : Manuel Pinto

iklan
iklan

Leave a Reply

iklan
error: Content is protected !!