DILI, (TATOLI) – Prezidente Komisaun Funsaun Públika (KFP), Faustino Cardoso, hateten komisaun to’o agora ladauk simu lista naran funsionáriu públiku ne’ebé atu sai apoitmentu polítika hodi ba ajuda servisu iha gabinete membru governu da-ualu nian.
“To’o ohin loron Komisaun Funsaun Públika seidauk simu lista ruma ne’ebé iha relasaun apoitmentu polítika, mezmu governu atuál servisu la’o ona”, Prezidente KFP, Faustino Cardoso, ba ajénsia Tatoli iha nia servisu fatin Matadouro, ohin.
Faustino hatete kuandu ema hirak ne’e mai hosi funsionáriu públiku no hakarak apoia servisu gabinete membru governu nian, presiza hato’o lisensa mai komisaun, nune’e bele fó lisensa ne’ebé la iha vensimentu, se la’e bele implika ba servisu no ikus mai bele hetan demisaun.
“Ita lakohi funsionáriu públiku ida tanba la la’o tuir prosedimentu depois sai tiha hosi funsaun públika”, dehan.
Biar nune’e, KFP simu ona sira ne’ebé mak sai membru governu no husu ona lisensa espesiál ne’ebé la ho vensimentu iha nain hirak ida (la temi detallu) maibé ba apoitmentu polítika seidauk iha.
Enkuantu, apoitmentu polítika nia vensimentu baibain mai hosi bem e servisu no la mai hosi saláriu no vensimentu.
Cardoso esplika dekretu lei 27/2016 ne’ebé define kona-ba ema hirak ne’ebé tama kategoria apoitmentu polítika ba gabinete membru governu nian. Númeru ne’e hira, no ema ida ho kategoria saida no seluk tan.
Jornalista: Zezito Silva
Editora: Rita Almeida
