DILI, (TATOLI) – Embaixadora Estadu Unidos Amerika (EUA) iha Timor-Leste, Kathleen Fitzpatrick, hasoru Primeiru-Ministru, Taur Matan Ruak, hodi reafirma koperasaun forte entre nasaun rua iha setór públiku no privadu.
ʺAmi mai iha ne’e atu reafirma fila fali parseria entre Timor-Leste ho Estadu Unidos Amérikaʺ, hatete Kathleen ba jornalista sira hafoin hasoru Xefe Governu iha Palásiu Governu, ohin.
Asuntu ne’ebé toka iha sorumutu mak programa foun EUA ho naran millenium Challenge Coorporation ne’ebé sei implementa iha TL.
ʺAmi ko’alia kona-ba visita altu nivel hosi millenium Challenge Coorporation ne’ebé semana oin sei mai hodi ko’alia kona-ba dezenvolvimentu públiku no setór privaduʺ, realsa Kathleen Fitzpatrick.
Ajénsia Amérika hanesan USAID, Peace Corps no seluktan maka implementa iha área defesa seguransa, demokrasia, apoiu setór privadu, formasaun lian inglés ba foinsae sira no koperasaun seluktan.
Iha sorumutu ne’e Kathleen Fitzpatrick hato’o kongratulasaun hosi Prezidente EUA, Donald Trump, ba Xefe Governu, Taur Matan Ruak.
Jornalista: Agapito dos Santos
Editora: Rita Almeida
