DILI, (TATOLI) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay, hateten Programa Nasoens Unidas ba Dezenvolvimentu (PNUD) kontinua ho kompromisu apoiu PNTL.
“Parseiru sira hosi UNDP hanesan Estadus Unidus Amerika (EUA), Japaun no Austrália ne’ebé ohin marka prezensa iha enkontru ne’e, nafatin atu fó apoiu mai instituisaun PNTL”, ulun boot PNTL ne’e ba jornalista sira hafoin reuniaun ho parseiru sira iha Kaikoli, ohin.
KomJer dehan apoiu hosi parseiru dezenvolvimentu nian durante ne’e mak iha área administrasaun, liuliu iha parte lojístika, rekursu umanu, finansa, informasaun teknolojia.
Nune’e mós iha apoiu orsamentu atu fasilita kona-ba servisu iha área operasionál ba polisiamentu komunitári no halo sosializasaun lei kona-ba arma branka, lei tránzitu rodoviáriu.
“Apoiu hirak ne’e, ohin ami halo avaliasaun ho parseiru UNDP atu fó hanoin ba malu, nune’e ba oin bele hadi’ak liután”, katak. Konklui halo mós avaliasaun servisu ho parseiru PNUD iha área operasaun pás, apoiu finanseiru ba prosesu dezenvolvimentu instituisaun PNTL nian.
Tanba ne’e, importante liu mak oinsá timoroan bele aproveita no aprende buat ruma hodi tau iha konsiderasaun, nune’e bele dezenvolve instituisaun.
Jornalista: Zezito Silva
Editora: Rita Almeida
