Governu sei selu projetu sira iha ona kontratu

DILI (TATOLI)–Ministru Obras Públika, Salvador Soares Dos Reis Pires, informa governu sei selu projetu sira ne’ebé iha ona kontratu, nu’udar obrigasaun ida.
“Iha 141 projetu , 76 mak iha kontratu tanba ne’e ita iha devér atu tau orsamentu atu selu tanba tuir lei hateten katak obrigasaun ne’ebé mak tuir kontratu, governu iha obrigasaun para tau iha orsamentu. Tanba ne’e, projetu 76 ne’ebé iha kontratu ita hatama atu selu iha fundu infraestrutura,” Salvador Soares Dos Reis Pires informa ba deputadu sira durante audiénsia públika ne’ebé hala’o iha plenária foin lalais ne’e.
Iha fatin hanesan Diretór Jerál Ajénsia Dezenvolvimentu Nasionál (ADN), Samuel Marçal klarifika projetu 141 ne’ebé konsege sai polémika katak la tama faze planeamentu, orsamentu, no laiha kontratu, iha 76 projetu mak kontratu la’o ona no 47 projetu mak seidauk iha kontratu no labele implementa tanba iha mudansa governu.
Projetu 141 ne’e mós implementa la’ós tanba kampaña polítiku nian, maibé deside hosi Konsellu Administrasaun Fundu Infraestrutura (CAFI-sigla iha portugés). Maibé ! iha Prosesu verifikasaun mak han tempu, bele to’o fulan lima ou neen, nune’e mós problema kona ba estandarte presu nian ne’ebé dala ruma kompañia la simu, entaun presiza halo negosiasaun atu konvense malu, buat sira ne’e mak han tempu hodi implementa tarde.
“Projetu balun atu ba eleisaun mak foin adjudika, ha’u hanoin dehan lae. Iha ida rua duni iha parte Maliana para atu fasilita de’it transporte atu asesu ba fatin votasaun. projetu balun ne’ebé konsidera emerjénsia duni hanesan iha Karimbala, hafoin monu iha fatin hira, tenke halo desizaun urjente ne’ebé CAFI tenke foti desizaun,” nia esplika.
Nune’e mós iha Ainaru, dalan kotu derrepente iha Jakarta 1 tenke loke fali iha Jakarta 2. Tanba ne’e iha projetu lubuk ida ne’ebé tenke foti asaun imediata, ne’ebé liuhosi CAFI.
Entretantu Vise Xefe Bankada Partidu Demokrátiku (PD), Adriano do Nascimento husu osan ne’ebé prevee atu selu dívidas ida ne’ebé, tanba tuir nia iha duni projetu balun laiha kontratu.
“Ami hatene iha projetu 100 resin mak fó iha kampaña nia laran, ne’e laiha kontratu. Atu selu dívidas ne’e projetu ida ne’ebé? Sera ké projetu ne’e iha kontratu? Ou projetu períodu kampaña nian ne’ebé mak laiha dokumentu no kontratu ne’e atu selu,” Adriano kestiona.
Jornalista: Julia Chatarina
Editór : Manuel Pinto

