DILI, (TATOLI) – Programa Nasaun Unida ba Dezenvolvimentu Públiku (PNUD-sigla portugés) kontinua hametin kooperasaun ho Sekretariu Estadu Komunikasaun Sosiál hodi habelar edukasaun sivika liuhosi públikasaun informasaun iha mídia nasionál.
Sekrétariu Estadu Komunikasaun Sosiál, Merício Juvinal dos Reis Akara, hato’o kestaun ne’e hafoin enkontru badak ho Diretór Ezekutivu PNUD, Claúdio Providas, iha Palásiu Governu, ohin.
ʺEdukasaun sivika oinsá uza mídia no komunikasaun sosiál hodi prodús programa edukativu, inovativu hanesan jere lixu, ambientál, joven sira ne’ebé iha kreatividade atu halo negósiu, kria kampu traballu rasik no seluk tanʺ, katak tan.
PNUD iha planu halo reality show kona-ba programa inovativu liga ho susesu joven sira iha área negósiu no seluk tan.
ʺHa’u kontente loos ho country director ninia vontade atu kolabora ho SEKOMS ba programa ne’e, tanba ne’e ami sei kontinua diskuteʺ, afirma.
PNUD nu’udar parseiru importante SEKOMS nian ne’ebé antes ne’e iha ona kooperasaun, tanba ne’e sei hametin liután.
Jornalista: Agapito dos Santos
Editora: Rita Almeida
