Julga Collaery Cs, Austrália “Labele Kontinua Rejime Soeharto”

DILI, (TATOLI)-Movimentu Okupasaun Tasi Timor (MKOTT), relasiona ho audiénsia ne’ebé Tribunál Austrália halo ba ativista Bernard Collaery no Witness K, aban, ezije ba Austrália atu la kontinua, hanesan rejime Soeharto halo, hodi limita liberdade espresaun husi povu kona-ba sasan sira ne’ebé mak la’o la di’ak.

“Tanba ne’e deklarasaun ida ne’e, ami ezije ba Austrália katak tenke respeita direitu liberdade espresaun husi kolega Bernard Collaery no Witness K ninian  tanba sira-nia direitu ba liberdade ida ne’e konsege hatuur tratamentu iguál entre Timor-Leste no Austrália,” deklara portavóz MKOTT, Juvinal Dias, ba jornalista sira liuhusi konferénsia imprensa, iha jardin Arkivu no Múzeu Rezisténsia Timor-Leste (AMRT), ohin.

Nia haktuir, Timor-Leste no Austrália Asina ona asina Tratadu Fronteira Marítima iha marsu, fulan hirak kotuk. “Ami hanoin katak tratadu ne’e mós ho baze fundamentu katak respeita ema sira ne’ebé mós envolve iha tratadu ida ne’e,” nia reforsa.

Portavóz MKOTT, Juvinal Dias haklaken, MKOTT iha planu kolleta asinatura husi povu, ativista sira iha Timor-Leste atu bele lori ba embaixada Austrália atu bele hanesan meius solidariedade husi povu Timor-Leste katak hamriik hamutuk ho Bernard Collaery no Witness K, ne’ebé ohin loron hetan kriminalizasaun husi rai-boot Austrália, rai ida ne’ebé promove demokrasia no liberdade ba direitu umanu sira.

Portavóz Juvinal Dias reforsa tan katak MKOTT nia haree ba solidariedade internasionál ne’e sein fronteira. “Ne’e buat fundamentu ida,” insiste portavóz MKOTT.

Segundu, tuir nia, Bernard Collaery no Witness K, nia kazu rasik akontese tanba sira halo advokasia ba Timor-Leste ninia direitu soberania tanba ne’e mezmu sira sidadaun Austrália, mezmu tribunál Austrália mak julga maibé julgamentu ne’e nia hun mak direitu Timor-Leste nian kona-ba fronteira Marítima.

“Tanba ne’e ami la konsidera ne’e problema doméstika Austrália nian maibé ne’e ami konsidera katak ne’e problema solidariedade internasionál nian. Ne’e buat prinsipál ida,”  hateten portavóz Juvinal Dias.

“Segundu, mezmu sira sidadaun Austrália, ami hanoin katak Austrália hanesan nasaun boot tenke fó ezemplu di’ak oinsá atu fó liberdade ba ema seluk kona-ba liberdade ba direitu espresaun nian atu fó sai saida mak la di’ak sira sente kona-ba polítika ruma iha sira-nia nasaun rasik iha relasaun ho rai seluk nia moris,” nia reforsa tan.

Portavóz Juvinal Dias konsidera katak povu Timor-Leste sai vítima barak tanba ho polítika Austrália nian mós, tanba iha 1975, Austrália rasik politikamente apoiu invazaun Indonézia nian mai Timor-Leste, ne’ebé povu Timor-Leste tenke selu maizumenus vítima 200.000 ba durante okupasaun.

“Austrália diplomatikamente apoiu invazaun ida ne’e, mezmu ita hatene ema Austrália lubuk ida, ativista barak mós apoiu Timor-Leste nia ukun rasik aan, maibé governu Austrália sempre buka, hili dalan atu apoiu autoritarian sira iha Indonézia, rejime sira atu hanehan povu Timor-Leste,” nia lembra.

Portavóz MKOTT hateten katak hanesan povu Timor-Leste MKOTT mós husu Austrália atu labele kontinua sira-nia polítika uluk ne’ebé sempre tau Timor-Leste iha okos, atu sira tenke para halo kriminalizasaun ba Bernard Collaery no Witness K, ne’ebé hodi kontinua hanehan povu Timor-Leste hanesan rai ida ki’ik iha sira-nia matan.

“Movimentu ida ne’e hakarak hatudu katak Timor-Leste mós hanesan nasaun seluk. Ami husu Austrália atu trata Timor-Leste ho di’ak liu i mós fó tratamentu di’ak ba ativista solidariedade internasionál sira ne’e,” akresenta portavóz MKOTT, Juvinal Dias

Portavóz MKOTT, Juvinal Dias informa mós katak MKOTT planu sei ‘lobby’ Parlamentu Nasionál-órgaun ne’ebé aas liu reprezenta povu Timor-Leste hakarak atu halo asaun ruma hodi hato’o sentidu solidariedade povu Timor-Leste nian.

“Iha tempu badak, ita sei koko atu halo audiénsia no husu Parlamentu atu halo reprezentasaun ne’e ho di’ak katak sira bele hakerek karta aberta ida ba Austrália hodi ezije, hato’o saida mak povu Timor-Leste sente kona-ba kriminalizasaun ba Bernard Collaery. Ida ne’e mak MKOTT ninia sujere,” dehan portavóz MKOTT.

Nia hatutan, MKOTT liuhusi konferénsia imprensa ne’e, MKOTT hakarak atu hato’o ita-nia mensajen ba governu katak luta Timor-Leste nian ne’e la’ós manan fronteira Marítima maibé mós atu hatuur direitu, demokrasia iha rai ida ne’e mós hanesan obrigasaun ida.

“Tanba ne’e, Timor-Leste hetan ninia soberania tanba iha mós apoiu husi solidariedade internasionál, moralmente governu Timor-Leste mós tenke hatudu nia solidariedade ba sira ne’ebé durante tempu balun nia laran, fó sira-nia tempu, sakrifika sira aan rasik husi risku boot ida hodi luta, apoiu ba Timor-Leste nia soberania. Espera governu bele rona,” tenik Portavóz MKOTT, Juvinal Dias.

Entretantu, MKOTT sei halibur asinatura solidariedade ba Bernard Collaery no Witness K, iha jardin Liceu, AMRT nian, hahú aban, kuarta 12 to’o 13 setembru tinan ne’e, depois loron 14 iha Fundasaun Haburas nia oin, Palapasu no segunda, 17 semana oin MKOTT sei entrega mensajen solidariedade ne’e ba embaixada Austrália, nu’udar parte ida haruka ba governu Austrália.

Aktu mensajen solidariedade ne’e mós hanesan agradesimentu ida ba ativista Bernard Collaery no Witness K, ne’ebé ajuda ona Timor-Leste hodi ajuda no defende interese Timor-Leste nian , ne’ebé ikus mai hetan mós akuzasaun husi governu Austrália.

Ho nune’e, MKOTT husu ba entidade tomak, povu tomak, universitáriu sira hotu, nune’e mós ativista Timor-Leste nune’e mós ativista internasionál iha Timor-Leste.

Asinatura solidariedade ba Bernard Collaery no Witness K ne’e mós nu’udar kontinuasaun husi atividade ne’ebé MKOTT halo ona durante ne’e hasoru governu Austrália.

Entretantu Soeharto, hanesan eis Prezidente Repúblika Indonézia ne’ebé durante nia lideransa implementa rejime ditadura. Iha nia ukun durante tinan 30 resin, okupa Timor-Leste ho meius ilegál, nune’e durante tinan 24 laran, Timor-Leste sai hanesan Provínsia Timor-Timur.

Jornalista: Rafy Belo

Editór : Manuel Pinto