DILI, (TATOLI) – Prezidente Tribunál Rekursu (PTR), Deolindo dos Santos, hato’o preokupasaun servisu tribunál nian ba Primeiru-Ministru (PM), Taur Matan Ruak, atu tau osan ne’ebé sufisiente.
“Atu haree oinsá bele tau orsamentu ne’ebé sufisiente ba tribunál para bele haree kona-ba organizasaun tribunál nian, tanba bainhira ko’alia kona-ba asuntu ne’e presiza prepara organizasaun judisiál ne’e rasik, rekursu umanu, no infraestrutura”, tenik ba jornalista sira iha Palásiu Governu, tersa ne’e.
Nia hatutan, tempu badak sei ko’alia konaba Orsamentu Jerál Estadu (OJE) 2019, entaun nia parte hato’o preokupasaun ba Xefe Governu, mesmu OJE 2018 la’o hela, maibé nia hato’o ba PM atu haree orsamentu 2019 ba Tribunal Rekursu (TR).
“Kondisaun servisu fatin Tribunál ne’e balun la permite ona para servisu ho di’ak, iha Tribunal Distritál Dili (TDS) laiha kondisaun ona, bainhira rai nakdoko, edifísiu ne’e bele iha risku”, katak tan.
Biban ne’e, Deolindo mós informa sobre Asembleia Jerál Tribunál Kontas CPLP ne’ebé Timor-Leste mak sei sai uma nain ba eventu ne’e, ne’ebé sei realiza iha loron 27 to’o 28 fulan setembru.
“Tanba ne’e ha’u mai hato’o pedidu ba PM atu konserta ajenda ho atividade ne’ebé sei hala’o iha tempu badak, nune’e vizita kortezia sei hala’o mai PM nu’udar orgaun soberania ida no sei hala’o vizita ba Prezidente Parlamentu Nasionál nomós ba Prezidente Repúblika rasik, ida ne’e sei akontese iha loron dahuluk, ne’ebé eventu ne’e sei realiza, hafoin sei kontrinua ho programa sira ne’ebé mak sei finaliza iha loron 28 setembru”, katak.
Jornalista: Julia Chatarina
Editora: Rita Almeida
