Lei Orgánika Foun Ameasa Ita-nia Ambiente ho Konflitu Interese

DILI, (TATOLI)-Organizasaun Naun-governamentál La’o Hamutuk ezije Governu foun atu altera lalais Dekretu-Lei No. 14/2018, 17 Agostu Orgânica do VIII Governo Constitucional, ne’ebé esplika estrutura, objetivu no kompeténsia sira ba kada Ministériu, tanba lei ida-ne’e mak ameasa povu nia futuru liuhosi hafraku protesaun ba Timor-Leste nia ambiente.

“La’o Hamutuk haree katak fó podér ba Ministériu Petróleu no Mineiru (MPM) atu emite lisensa ambientál la tuir prinsípiu boa governasaun no sei sakrifika integridade Autoridade Ambientál RDTL nian,” haktuir komunikadu La’o Hamutuk diri mai redasaun TATOLI, ohin.

Tuir La’o Hamutuk, dekretu-Lei No. 14/2018 fó kbiit ba MPM (uluk MPRM) atu aprova lisensa ambientál ba projetu dezenvolvimentu boot sira iha setór petróleu no mineiru, nomós alista MPM nia knaar hanesan atu dezenvolve, promove no atrai investimentu husi rai-li’ur iha setór ida-ne’e. MPM mós hetan knaar atu koordena implementasaun Projetu Tasi Mane no deside termu kontratuál ho kompañia sira ne’ebé halo prosesu atu buka no atu esplora ita nia rekursu naturál sira.

La’o Hamutuk ezije katak podér MPM nian la bele inklui aprova no emite lisensa ambientál ba sira-nia projetu rasik tanba konflitu interese. Prosesu lisensamentu ambientál tenke independente, iha kontabilidade no transparénsia hodi proteje ita nia natureza no ambiente. Governu la bele fó espasu hodi ema ruma bele hasees an husi rekerimentu prosesu legál kona-ba lisensamentu ambientál ne’ebé iha tiha ona.

Regulamentu ambientál iha ona ninia prinsípiu, mekanizmu no prosesu liuhosi Lei Base ba Ambiente (Dekretu-Lei No. 26/2012) no Lei Lisensamentu Ambientál (Dekretu-Lei No. 5/2011). Lei sira ne’e define Autoridade Ambientál nia knaar atu lider prosedimentu Avaliasaun Impaktu Ambientál no atu emite Lisensa Ambientál ba projetu sira inklui iha setór petrolíferu no mineiru.

Tuir lei ambientál, ba projetu boot ne’ebé bele iha impaktu signifikante iha ambiente (Kategoria A), proponente projetu tenke halo estudu hodi avalia impaktu ambientál husi projetu ne’e, halo konsultasaun públiku hodi komunidade lokál komprende no bele hatán ba projetu, no aprezenta dokumentu sira ba Autoridade Ambientál.

Autoridade Ambientál ne’ebé  iha kompeténsia atu regula no lidera prosesu aprovasaun no hasai lisensa ambientál mak Sekretariadu Estadu ba Ambiente liuhosi Diresaun Nasionál Kontrolu Poluisaun no Impaktu Ambientál (DNCPIA).  Tuir La’o Hamutuk nia observasaun, entidade DNCPIA iha esperiénsia ona nu’udar entidade tékniku ho kompeténsia hodi implementa polítika no lei sira liga ba promove no prezerva ita nia meiu ambiente.

Tan ne’e, La’o Hamutuk ezije atu uza matenek, esperiénsia no kompeténsia Autoridade Ambientál nian ne’ebé iha ona, no haforsa liután sira nia servisu liuhosi investimentu ba DNCPIA tuir sira-nia nesesidade. Nune’e bele implementa ho di’ak lei ambientál sira no tau matan ba dezenvolvimentu hodi asegura ninia sustentabilidade.

La’o Hamutuk esplika katak hodi regulasaun ambientál sai efetivu, tenke lidera husi entidade Estadu ne’ebé independente no la’ós entidade ne’ebé promove no implementa projetu. Mekanizmu ida ne’e mak sei ajuda prosesu kontabilidade (check and balance), transparénsia no asegura laiha intervensaun polítiku ba implementasaun lei sira ne’e. Nune’e bele garantia sustentabilidade ba ita-nia rekursu naturál sira no fó benefísiu ba povu Timor-Leste agora no iha futuru.

Lisensamentu Ambientál maka maneira importante Estadu nian atu asegura ita bele proteje ita-nia ambiente nia kondisaun moos no saudável agora no ba oin tempu naruk.  Nu’udar ezemplu: molok governu halo estrada, aeroportu ka edifísiu boot ruma, no molok kompañia privadu halo fábrika, otél boot, planu turizmu iha foho ka tasi ibun, tuir lei sira tenke aprezenta sira-nia dokumentu projetu sira hodi iha avaliasaun hafoin hetan lisensa husi Autoridade Ambientál.

Nune’e, Autoridade Ambientál bele kontrola prosesu dezenvolvimentu hodi asegura projetu sira la’o tuir planu ne’ebé di’ak, sustentável no la iha impaktu negativu ba ema nia ambiente no moris.

Jornalista: Rafy Belo

Editór : Manuel Pinto