Mídia Kontribui Konsolida Relasaun Sosiál

DILI (TATOLI)­­-Akadémiku Universidade Nasionál Timor Lorosa’e (UNTL) konsidera katak media kontribui konsolida relasaun sosiál, interasaun no formasaun karakter liuhusi programa, asuntu no seluk tan ne’ebé media hanesan jornál, rádiu, televizaun no online oferese ba iha sosiedade.

“Husi rezultadu ne’ebé ha’u hetan, konklui fila fali katak, ita-nia rona na’in sira, sira benefísia ba buat lubun ida, primeiru sai lideransa tanba hola parte estrutura fens nian ne’e, oinsá realiza aktividade sira no oinsá koordena ho serbisu sira ne’ebé eziste,” informa peskizadór Miguel Gonçalves ba Ajénsia TATOLI, iha Kampus Liceu-UNTL, ohin.

Akadémiku UNTL ne’e informa, peskiza ne’ebé nia halo kona-ba ouvir radio como uma consolidação relação social identifika katak ema barak gosta rona rádiu no barak mós la gosta, liliu joven sira.

Joven sira ne’ebé gosta rona rádiu, nota katak hola parte iha prosesu, atividade oioin, hodi rezulta prosesu relasaun sosiál. “Joven ohin loron gosta atualiza iha facebook, iha redi sosiál ninian duke rádiu ou televizaun ho jornál,” haktuir peskizadór, Miguel Gonçalves, iha marjen konferénsia internasionál edukasaun datolu, iha kualidade nu’udar mós aprezentadór ida.

Peskizadór ne’e relata, peskiza ne’ebé nia hala’o ba audiénsia sira uza metodolojia kualitativa hodi deskreve oinsa relasaun entrevistadu (audiénsia), liliu simpatizante ka fans ho media.

“Programa dedikatóriu kuaze iha rádiu hothotu, maibé iha diferénsia ema hanaran prógrama ne’e; ezemplu hanesan iha Rádiu Akadémika hanaran Hamaluk Belun, iha R-STL programa ne’ebé hanesan maibé naran diferente, nune’e mós rádiu LABEH, rádiu sira seluk mós hanesan,” hateten akadémiku ne’e.

Akadémiku Miguel Gonçalves hateten, husi peskiza ne’ebé nia hala’o, husi simpatizante sira ne’e sempre sintoniza rádiu, liliu iha Rádiu Akadémika deskobre katak iha ema na’in sanulu husi munisípiu ne’ebé diferente sira kria “Irmãos” eh maun-alin, hodi bele iha susar, atividade todan tuur hamutuk buka meius tulun malu. “Entaun benefísiu ne’e inspira ha’u hodi ha’u elabora peskiza ida ne’e,” nia subliña.

Nia esplika, bainhira media fó informasaun di’ak ne’e vinkula kedas papel edukativu iha laran basá transmite koñesimentu ba audiénsia sira no halo sira bele sai maduru no iha maturidade.

Rádiu hanesan mós media seluk divulga informasaun relasiona ho siénsia, kultura, relasaun umana ema nian inklui inspirasaun sira hodi inspira audiénsia sira.

“Ita fó informasaun husi rádiu, ita la diskrimina ema ida, maske nia moras, difisiente ekonomikamente mós ita labele diskrimina i riku mós ita labele diskrimina. Husi parte ida ne’e mak rádiu ne’ebé dala ruma enfrenta maka ambiente ne’ebé diferente, entaun ida ne’e hanesan dezafiu ida,” konsidera akadémiku ne’e.

Nune’e, atu hadook aan husi tentativa diskriminatóriu, akadémiku no peskizadór ne’e sujere katak tantu audiénsia, enuansiadór iha obrigasaun atu lee, rona no asiste bebeik informasaun edukativa sira.

“Rádiu ne’e fleksível ba ita atu assesu informasaun tanba atividade seluk ita bele rona, la’o iha dalan mós ita bele rona no kualaker maneira ita bele rona rádiiu; se hakarak atu hatene benefisiu, bele asesu ba rádiu, atu nune’e hetan informasaun diak liu tan iha futuru,” dehan peskizadór ne’e Miguel Gonçalves.

Tuir relatóriu Konsellu imprensa, relatóriu nú. 01. Data 10 maiu 2017 fó sai katak media imprime hamutuk 10, rádiu 33, televizaun tolu no media online haat.

Jornalista: Rafy Belo

Editór : Manuel Pinto