DILI, (TATOLI) – Xefe Bankada Partidu Unidade Dezenvolvimentu Demokrátiku (PUDD), António De Sá Benevides, husu Prezidente Repúblika (PR), Francisco Guterres Lú-Olo, atu kontinua halo diálogu ho entidade hotu.
“Ba Prezidente Repúblika, hanesan aman nasaun atu kontinua halo diálogu ho entidade hotu, liu-liu ho Primeiru-Ministru, Maun Taur Matan Ruak, hodi bele solusiona situasaun polítika iha rai laran, tanba to’o agora membru governu lubuk ida sei pendente hela atu simu pose”, intervensaun iha abertura dahuluk ba sesaun kinta ljislatura Parlamentu Nasionál (PN) iha plenária, ohin.
Nia dehan, karik ida ne’e hanesan planu, estratéjia no táktika hodi eduka jerasaun foun sira, nu’udar jerasaun foun nia parte simu, maibé karik tanba egoismu no arogansia hodi lakohi rona malu entaun tenke aprende atu rona konsellu husi jerasaun foun sira.
Nia mós fó hanoin Parlamentu Nasionál (PN) hanesan fatin atu ko’alia kona-ba povu nia moris, maibé koa’lia buat ne’ebé presiza ko’alia no la-presiza koa’lia buat ne’ebé la-presiza koa’lia.
“Parlamentu la’os fatin atu konta istória individuál ema ida nian no la’os fatin atu sura terus no kolen ema ida nian. Maibé fatin atu dezafia no argumenta idea hodi bele prodús desizaun kualitativu”, katak.
Deputadu ne’e hatutan Timor-Leste adopta sistema demokrasia, katak poder tomak mai husi no sei fila fali ba povu, maibé konsiente katak demokrasia iha mos nia frakeza.
Demokrasia dalabarak haree de’it ba nia kuantidade no la haree ba nia kualidade. Haree de’it ba maioria no minoria. Maibé ita hotu haluha katak atu hakat to demokrasia ita tenke liu husi prosesu diálogu no konsensu.
“Tan ne’e povu husu nai deputadu sira hotu atu promove diálogu no konsensu iha parlamentu ida ne’e. Povu hato’o nia mensajem klaru, liu husi rezultadu eleisaun antesipada, katak partidu polítiku sira hotu tenke servisu hamutuk”, dehan tan.
Jornalista: Julia Chatarina
Editora: Rita Almeida
