Mákina Estadu Sei Falha Kuandu PR La Promulga OJE

DILI (TATOLI) – Vise Prezidente Parlamentu Nasionál, Maria Angélica, dehan iha fulan ida ne’e nia laran Prezidente Repúblika (PR) seidauk iha serteza atu promulga ka veta, konsekuénsia mak mákina Estadu sei la funsiona.

“Kuandu fulan ida ne’e mak ita falla entaun mákina Estadu sei la funsiona. Osan duodésimu durante ne’e ita uza, nia saldu kuaze la iha ona, tanba ne’e ita depende ba Orsamentu Jerál Estadu (OJE) 2018,” Vice Prezidente PN ne’e informa ba jornalista sira iha Parlamentu Nasionál (PN), ohin.

Nia dehan osan duodecimo besik hotu ona, maibé Gabinete Prezidente Repúblika seidauk hato’o informasaun ruma mai PN kona-ba Xefe Estadu nia intensaun atu veta ka promulga OJE 2018.

Ho situasaun falta de komunikasaun ne’e, tuir Angelina “Ita kontinua la’o ho orsamentu duodecimo, maibé la to’o atu sustenta tan mákina Estadu.  Ita sei depende ba promulgasaun OJE 2018. Espera katak Xefe Estadu bele promulga ona iha tempu badak nia laran.”

Maibé ! OJE 2018 mak la promulga sei fó efeitu hodi finansia ba funsionamentu mákina Estadu, liuliu orsamentu mina ba jeradór la iha, subsídiu ba idozu la iha, ospitál inklui saláriu no vensimentu.

Prezidente Repúblika la promulga, hakarak ka lakohi prontu simu konsekuénsia tanba nia (Xefe Estadu) sei uza nia kompeténsia ho di’ak, atu veta ka promulga, maibé parte seluk mós tenke haree ba kestaun nesesidade urjénsia iha rai laran.

Jornalista : Zezito Silva

Editór : Manuel Pinto