DILI, (TATOLI) – Primeiru-Ministru (PM), Taur Matan Ruak, deklara nia la halo konspirasaun ho Prezidente Repúblika (PR), Francisco Guterres Lú Olo, hodi impede kandidatu membru Governu na’in sia atu simu pose.
“Vantajen saida maka ita manán hosi konspirasaun? Konspirasaun ita la manán buat ida”, akresenta Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho polémika katak primeiru-ministru no prezidente repúblika halo konspirasaun hodi impede kandidatu na’in sia.
Nia dehan hanesan primeiru-ministru, kontinua ko’alia ho prezidente repúblika, tanba argumentu ne’e labele konvense nia atu altera ninia pozisaun.
“Konversa ho prezidente repúblika tenke kontinua no prezidente repúblika nunka taka odamatan ba primeiru-ministru”, afirma tan.
Nia husu ba públiku atu pasénsia hein bainhira maka akontese pose ba ema na’in sia ne’e ka la’e, tanba labele hanoin de’it katak rezolve buat hotu dala ida de’it no se fásil karik rezolve ona iha inísiu.
“Bainhira estrutura la kompletu iha impaktu ba Governu, tanba redús efisiénsia no efikás serbisu, maibé ne’e realidade ida ne’ebé maka tenke simu ho atensaun maka’as, kalma no serenidade para ita kontinua la’o ba oin”, katak tan.
Jornalista: Xisto Freitas
Editora: Rita Almeida
