DÍLI, (TATOLI)-Universidade Nasionál Timor Lorosa’e (UNTL), Fakuldade Edukasaun, Arte no Umanidade (FEAU), Departamentu Língua Portugeza (DLP) dinamiza atividade “Aprender a Ensinar, Ensina a Aprender” ka aprende hanorin no hanorin hodi aprende, iha ensinu primária, liliu primária Balide-Díli, kada sesta.
“Atividade ne’ebé hala’o husi estudante ne’e hodi hatudu katak ita bele la iha osan maibé iha imajinasaun hodi kria matéria. Buat ne’ebé simples,” dehan profesora orientadora, Edite Castro, ba Ajénsia TATOLI, iha Balide-Díli, ohin.
Nia haktuir katak iha atividade ne’e estudante DLP dezenvolve atividade sira hanesan konta istória iha idioma portugés nomós tetun, depois múzika no jogu ne’ebé prepara rasik husi futuru profesór sira ne’e.
“Ami bolu ‘aprender a ensinar, ensinar a aprender’, nu’udar motivasaun ida ba estudante sira hotu,” akresenta orientadora Edite Castro.
Iha fatin hanesan, estudante DLP, Apolonia Babo iha entrevista ho Ajénsia TATOLI konfirma katak atividade ne’e sira halo hodi hakbesik aan liutan ho estudante sira iha eskola hodi aprende hanorin no hanorin hodi aprende atu bele prepara aan di’ak liutan iha prezente no ba futuru.
“Ho maneira hanesan ne’e, ami hahú aprende oinsa bele integra aan ho estudante sira iha eskola, hodi dinamiza, organiza atividade interesante sira hodi estimula hanoin no kreatividade hamutuk ho estudante sira,” dehan estudante, Apolonia Babo.
Nia akresenta, dezafiu sira ne’ebé mak sira hasoru iha inísiu atividade ne’e mak oinsa bele akumula estudante sira-nia hanoin, hakarak no karakter sira hodi bele partisipa ativa iha atividade nia laran.
Maske nune’e, estudante UNTL ne’e hateten papel profesór nian importante mós iha promosaun língua ofisiál, hanesan futuru edukadór mezmu dezafiu iha korajen nafatin hodi dezenvolve atividade sira ho lian ofisiál sira ne’ebé konsagra ona iha ita-nia konstituisaun.
Nune’e, liuhusi atividade “Aprende a Ensinar, Ensina a Aprender” sira hahú aplika teória sira durante iha aula, liuhusi dezenvolve atividade sira hanesan jogu, múzika, leitura no seluk tan.
Entretantu, Grupu “Aprender a Ensinar, Ensinar a Aprender” ne’e harii husi profesora Edite Castro iha tinan 2017 ho objetivu atu divulga no konsolida lian portugés iha Timor.
Estudante DLP, ho apoiu husi profesora Edite Castro kria atividade sira, hili istória ida hodi konta ba labarik sira, traduz ba tetun hodi nune’e sira bele komprende di’ak liu, hala’o jogu, múzika sira no atividade sira ne’ebé mak relasiona ho istória.
Nune’e, enkuantu hanorin, aprende mós, depois prepara matéria sira ne’e hotu, ne’ebé mak aprende no aplika fali ba labarik sira iha segundo ano. Hanorin ho maneira hanesan ne’e, ho atividade kurikulár sira, UNTL-Universidade públika bele ajuda halekar língua liuhusi eskola sira.
Jornalista: Rafy Belo
Editór : Manuel Pinto
