DILI, (TATOLI) – Organizasaun PLAN Internasionál komemora ninia loron hodi fó oportunidade ba Silviana Maria asume funsaun nu’udar Prezidente Parlamentu Nasionál (PPN) durante oras ida nia laran.
Objetivu simulasaun ne’e hasa’e mentalidade bainhira hamriik iha fatin públiku, liuliu partisipa iha vida polítika.
“Ha’u mai hosi família simples, hosi Lequidoe (Aileu), ami nia família mai hosi oan feto nain tolu no oan mane nain rua, ha’u nia inan no aman mezmu nunka hetan informasaun kona-ba igualdade jéneru maibé ami nia inan aman halo tratamentu ne’ebé hanesan. Ohin ha’u bele hola kna’ar hanesan Prezidente Parlamentu Nasionál iha oras ida nia laran hanesan oportunidade di’ak tebes”, hatete nia ba jornalista sira iha uma fukun Parlamentu Nasionál, ohin.
Hanesan feto rutál, nia espresa sentimentu kontente tanba hetan oportunidade. “Ha’u la hetan oportunidade barak liu kompara ho maluk feto sira seluk, tanba ha’u lorloron tenke ajuda ha’u nia inan aman iha to’os. Dader ha’u tenke ba to’os atu ajuda no meiu-dia ha’u tenke fila mai uma hodi prepara ba eskola. Iha eskola ha’u foin aprende buat barak hosi eskola sira”, haktuir.
Kontente ne’e, tuir nia, dala-barak ema oferese de’it oportunidade ba joven sira iha vila maibé agradese tanba bele mós hetan oportunidade.
“Espera katak ha’u nia prezensa iha atividade ne’e sei lori mudansa ba ha’u nia maluk feto sira seluk ne’ebé hela iha área rurál”.
Iha ámbitu ne’e, Silviana konsege reune ho Prezidente Komisaun Nasionál ba Eleisaun (CNE-sigla portugés), Alcino Barris, ho komisáriu seluk, autoridade eleitorál ne’e fó onra, tanba ho espertu fó orientasaun no korajen atu kontinua organiza hodi serbí rai ne’e.
Prezidente PN, Arão Noe, hatete: “Ne’e solisitasaun ida hosi PLAN Internasionál, tanba ohin sira komemora sira nia loron, tanba ne’e sira hakarak hakbiit, haforsa labarik feto rurál sira hodi hetan tratamentu ne’ebé hanesan”.
“Sira mai halo audiénsia horibainrua, sira husu tempu atu oinsá lori labarik ida iha minútu balun nia laran hodi hala’o funsaun PPN”, haktuir.
Nia dehan uma fukun hanesan fatin demokrátiku. “Ohin bele ha’u, tempu seluk bele ema seluk no loron seluk nia mak bele mai tuur fali iha ne’e”.
Nia fó onra ba labarik feto sira, emansipasaun, atu iha iguldade jéneru bele akontese, mezmu kiik oan maibé signifikadu tebes.
Jornalista: Zezito Silva
Editora: Rita Almeida
