DILI, (TATOLI)- Ministériu Agrikultura no Peska (MAP) ho Diresaun Jerál Estatístika (DJE) Ministériu Finansas hahú ona treinamentu ba treinadór sira (TOT) hamutuk ema na’in-20 ba sensu agrikultura 2018 nian.
Diretór Jerál Estatístika Ministériu Finansas, Elias dos Santos Ferreira, hatete MAP no DJE organiza treinamentu ba treinadór nasionál sira ne’ebé maka husi sira ne’e sei fó fali treinamentu ba treinadór sira ne’ebé maka sei halo treinamamentu to’o iha nivel postu-administrativu.
“TOT ne’e important tanba tenke treinu ba kestionáriu, tenke domina kestionáriu ne’ebé sei uza ba entrevista umakain agrikultór iha territóriu tomak”, Elias dehan hafoin abertura ba atividade ne’e iha Kaikoli, ohin.
Hatutan planu DJE nian iha sensu ida ne’e sei uza computer-assisted personal interviewing (CAPI) ne’ebé di’ak liu tanba bainhira entrevista umakain sira iha área rurál, automátikamente entrevista hotu dadus ne’e sei haruka diretamente mai nasionál hodi kompila hamutuk nune’e bele hamoos data balun ne’ebé falla karik haruka filafali hodi halo entrevista.
“Ida benefísiu ida boot ita entrevista uza CAPI depois fulan tolu ita iha rezultadu prelimináriu, iha fulan neen ita bele iha ona relatóriu finál hodi nunee dadus ne’e fó ba policy maker sira para bele halo planu dezenvolvimentu ba ita-nia país ida ne’e”, katak.
Tanba ida ne’e sai hanesan sensu agrikultura dahuluk iha Timor-Leste maka iha mós péritu husi Food and Agriculture Organization (FAO) nia rejionál office husi Tailándia mai hodi fó treinamentu uza CAPI.
“Maibé ami-nia tékniku sira hatene ona oinsá uza CAPI ne’e para halo sensu agrikultura. Tanba ne’e semana ida ne’e sei halo treinamentu depois sira halo prátika iha fatin balun besik Dili, depois tuir planu iha fin novembru sei bá halo pilotu iha munisípiu ualu ne’ebé maka sai hanesan área selesionadu antes ita bá sensu iha marsu 2019”.
DJ ne’e esplika sensu loloos halo iha marsu tinan oin tanba hakarak bainhira agrikultór sira kuda rai maka foin bá nune’e halo mós estimativa ba sira-nia produsaun hetan hira ba kada rai ne’ebé agrikultór sira sei hatete.
Diretór Nasionál Peskiza, Estatístika no Informasaun Jeográfika MAP, Claudino Ninas Nabais, dehan TOT ne’e hanesan inísiu ida atu konkretiza implementasaun sensu pilotu nian, maski iha faze rua mak implementasaun pilotu ba sensu agríkola tuir kalendáriu sei halo iha inísiu dezembru no sensu ida loloos ne’ebé sei hala’o iha marsu 2018.
“Durante ne’e iha preparasaun lubuk ida mak ita halo entermu ba instrumentu sira ne’ebé sei uza liuliu atu define loloos sá instrumentu ida ne’ebé apropriadu liu utiliza iha rai Timór nian, liuliu ba kondisaun, topográfika Timór nian ne’ebé tetuk, foho lolon, agrikultór hela iha rai tetuk, maibé halo to’os iha foho-lolon, entaun komplikasaun sira ne’e maka fó hanoin mai ita oinsá bele hili instrumentu ne’ebé apropriadu tebes”.
Tanba ne’e treinamentu ne’ebé halo ne’e atu konkretiza loloos katak Timor-Leste prontu ona para implementa sensu agríkola dahuluk ne’ebé foin halo depois ukun-an.
Jornalista : Maria Auxiliadora
Editór : Manuel Pinto
