DILI, (TATOLI)-Embaixada Japaun iha Timor-Leste promove diskursu lian japonés dahuluk ba timoroan sira, dezde ezisténsia embaixada Japaun nian iha nasaun ne’e.
Embaixadór Japaun ba Timor-Leste, Hiroshi Minami hateten, iha nia diksursu katak eventu ne’e oportunidade di’ak ida ba estudante sira hodi halo diskursu ho lian Japaun nian.
“Sei motiva imi aprende lian Japaun no imi sente besik ho rai no povu Japaun,” dehan embaixadór Hiroshi Minami perante públiku iha auditóriu, Universidade Nasionál Timor Lorosa’e (UNTL), ohin, iha abertura eventu ne’e.
Diplomata Japonés ne’e mós informa, iha biban entrevista ho jornalista sira, katak iha marsu, 2019 sei haruka tan timoroan balun ba Japaun, integra iha programa JENESYS (Japan-Eastasia Network of Exchange for Student and Youths).
“Iha tinan oin, 2019, ha’u-nia governu, embaixada hakarak haruka tan timoroan na’in 18,” informa Embaixadór Japaun ba Timor-Leste, Hiroshi Minami, iha marjen, kompetisaun diskursu entre timoroan ho lian japonés ne’e.
Iha fatin hanesan, Pró-reitór Asuntu Estudantil UNTL, Zeferino Viegas Tilman ba mídia sira katak kompetitór sira la’ós de’it husi UNTL, maibé barak liuhusi UNTL. Sira balun aprende iha UNTL, balun aprende iha fatin seluk.
Pró-reitór Asuntu Estudantil, Zeferino Viegas Tilman mós esplika katak UNTL sai sentru ba exelénsia, liuhusi atividade kurikulár nomós extrakurikulár; estudante aprende buat ne’ebé mak sira la aprende iha aula.
“Prosesu aprendizajen seluk ne’ebé sira rasik bele hetan iha li’ur, UNTL oferese para sira bele aprende extra, ikus mai sira uza fali kapasidade sira ne’e ba sira-nia aan iha mundu traballu,” dehan akadémiku ensinu superiór públiku ne’e.
Pró-reitór mós reforsa katak atu sai sentru exelénsia la’ós de’it husi parte akadémika. Maske nune’e konsidera, akadémika mós sai fatór importante ida atu sukat kapasaidade estudante nian.
Tanba ne’e, la’ós de’it lian japonés maibé lian seluk mós oferese iha UNTL. Alende ne’e mós prosesu aprendizajen, ba área seluk ne’ebé mak importante ba estudante sira. Unidade ida iha estudante nia fatin;Klube Estudu Akadémiku.
“Husi Klube Estudu Akadémiku ne’e kada estudante aprende sasan extra sira ne’ebé la aprende iha aula,” konklui Pró-reitór Asuntu Estudantil, Zeferino Viegas Tilman.
Entretantu, partisipa iha diskursu ne’e alende Embaixadór Japaun ba Timor-Leste, Hiroshi Minami, iha mós Reprezentante Japan Foundation-Jakarta, Mari Hiruta.
Jornalista: Rafy Belo
Editór : Manuel Pinto
