SEKOMS: Edukasaun Naun-Formál no Formál Kompleta Malu

DÍLI, (TATOLI)-Sentru Formasaun Naun-formál, GFD (Grace For Development) komemora nia ezisténsia ba tinan lima ho atribui sertifikadu ba nia formandu na’in 282.

Formandu ba kursu administrasaun na’in 17, jornalizmu na’in 125 no língua ingles na’in 140.

Sekretáriu Estadu Komunikasaun Sosiál (SEKOMS), Merício Juvinal dos Reis “Akara” hateten katak inisiativa sira presiza kontinua, presiza kolabora. Estadu no governu sei loke nia odamatan, atu diskute parte ne’ebé bele kolabora, bele apoia, tan nasaun ne’e ita hotu nian, presiza ita hotu nia kontribuisaun.

Formasaun na’un-formál no formál kompleta malu.“Iha koñesimentu di’ak; domina teória, iha kapasidade skill (abilidade-red) maka’as. Tanba, se lae, ita domina teória, ita laduun iha skill, ita sei la halo buat barak. Nune’e mós, ita domina skill ita laduun iha koñesimentu kle’an, ita-nia skill mós ita labele implementa,” dehan Sekretáriu Estadu, Merício Juvinal dos Reis “Akara”, iha Sentru GFD, Vila Verde-Díli, iha fim-de-semana ne’e.

Tanba ne’e, tuir SEKOMS, sei apoiu parte rua hotu; edukasaun formál nomós naun-formál.

“Hakarak fó hanoin mós, bainhira domina língua, ne’e mós ajuda, hanesan lian ofisiál rua (tetun no portugés-red), lian traballu rua (inglés no bahasa). Entaun, oportunidade para aprende língua haat ne’e hotu,” Sekretáriu Estadu, Merício Juvinal dos Reis “Akara” fó hanoin.

Governante ne’e akresenta tan, formasaun língua importante mós hanesan formasaun mídia. “Buat hirak ne’e hotu sai hanesan poténsia, haforsa juventude bainhira estadu presiza, ita-boot sira (juventude-red) bele kontribui, apoia aan no família nomós hahú halo plano de vida (planu moris nian-red),” realsa Sekretáriu Estadu, Merício Akara.

Nia esplika bainhira ita iha koñesimentu, la iha abilidade, la iha planu vida nian; ita atu ba ne’ebé no hahú husi ne’ebé nomós oinsá, ida ne’e dalaruma ita konfuzaun iha ita-nia laran.

“Ne’ebé, espera ho formasaun sira hanesan ne’e, fó hanoin ona mai ita oinsá hahú ona ita-nia planu vida nian di’ak liu. Planu vida iha ita-nia uma laran, iha komunidade, ba estadu no nasaun,” espera governante oitavu governu konstitusionál ne’e.

Sekretáriu Estadu Merício Juvinal dos Reis “Akara” mós informa katak hanesan SEKOMS sei fó atensaun, hanesan mensiona ona iha prioridade prinsipál SEKOMS nian.

Katak sei tau-matan, dezenvolve mídia sira nomós halo polítika ho dezenvolve mídia iha Timor-Leste, mídia públiku nomós privadu, tanba konsidera meius komunikasaun sira ne’e sei ajuda ita atu sai forte.

Komunikasaun entre estadu ho nia sidadaun nomós kanaliza sidadaun nia hanoin mai governu no estadu. “Entaun, meius komunikasaun hotu ita sei diversifika, sei apoia,” haklaken Sekretáriu Estadu Merício Juvinal dos Reis “Akara” perante públiku.

Entretantu partisipa iha komemorasaun ezisténsia Sentru GFD ba tinan lima no atribuisaun sertifikadu ba nia formandu sira, partisipa mós Sekretáriu Estadu Formasaun Profisionál no Empregu (SEFOPE), Júlio da Silva no ko’alia kona-ba Polítika SEFOPE suporta kursu naun-formá no fasilita foinsa’e sira ba tempu serbisu, ne’ebé lidera diretamente husi Diretór Ezekutivu GFD, Joanes Baptista Gomes.

Jornalista: Rafy Belo

Editór : Manuel Pinto